“მაქვს განცდა, რომ კატასტროფა გვემუქრება… ახლა სააკაშვილის გათავისუფლება კი არა, ეს არის მთავარი” – ახვლედიანი

პოლიტიკოსი, დეპუტატი, არმაზ ახვლედიანი, “ტვ პირველთან” სალომე ზურაბიშვილი საახალწლო მიღებაზე პოლიტიკოსთა მიპატიჟებას ეხმაურება და ამბობს:

“არათუ მისვლას ვაპირებ, მზად ვარ ცალ ფეხზეც დავდგე, ოღონდ რამე გვეშველოს. მაქვს განცდა, რომ რაღაც კატასტროფა გვემუქრება, მაქვს ეს განცდა, არ დაგიმალავთ… ამ დროს ამ აგიზგიზებულ ცეცხლზე ნავთის დასხმა, გამაგებინეთ, ვის ინტერესებშია? რა გვემართება? ერთი მხრივ თითქოს ვიწყებთ საუბარს შერიგებაზე და მეორე მხრივ ვაჩენთ სრული განხეთქილების ახალ, წარმოუდგენელ კერებს, რაც საუკეთესო ნოყიერი იარაღია კრემლისთვის, რომ საქართველოში არევა იყოს გარდაუვალი.

სალომე ზურაბიშვილის უფლებები შეზღუდულია, მაგრამ მას აქვს ისეთი უფლებები, რაც არ გააჩნია არც პრემიერს, არც დეპუტატებს, მას სხვა მანდატი აქვს და მინდა დავიჯერო, რომ ის გამოიყენებს ამ მანდანტს. მან უნდა შეასრულოს ახლა ამ არბიტრის როლი და შეძლოს მოგვიხმოს და გაგვაჩეროს.

პირველი და უმთავრესი, ყველაფერზე მნიშვნელოვანია… ყველა შეიძლება ამას ვერ იაზრებდეს, მაგრამ მიხეილ სააკაშვილი ამას იაზრებს და ახლა რომ კითხოთ, ის გეტყვით თქვენ, რომ მისი გათავისუფლება კი არ არის მთავარი, ახლა მთავარია საქართველოს ხსნა რუსების მარწუხებისგან. ახლა რუსეთი გვიკაკუნებს და გვეუბნება, რომ გამოვგლეჯ დასავლეთს შენ თავს და იქნები მონა… სააკაშვილისთვის ეს არის მთავარი. ნუ დავაყენებთ საკითხს იმ ფორმით, რამაც შეიძლება ყველა ხიდი დაწვას და ჩახეთქოს…”