შოუმენი და სატირიკოსი მაქსიმ გალკინი უკრაინელი ლტოლვილების დასახმარებლად დაგეგმილი საგასტროლო ტურნეს ფარგლებში თბილისის სცენაზეც გამოვა. Biletebi.ge-ს ფეისბუკგვერდზე გამოქვეყნებული ინფორმაციით, გალკინი სპორტის სასახლეში 15 ოქტომბერს გამართავს კონცერტს, ბილეთების გაყიდვა კი 25 ივლისიდან დაიწყება.
ივლისის ბოლოდან სექტემბრის ბოლომდე, გალკინის კონცერტები უნდა გაიმართოს თურქეთში, ლატვიაში, ფინეთში, ესტონეთში, პოლონეთში, დიდ ბრიტანეთში, ავსტრალიაში და ჩეხეთში.
მაქსიმ გალკინი რუსეთის მიერ უკრაინაში წარმოებულ ომს კრიტიკულად აფასებს. ის ცოლთან, მომღერალ ალა პუგაჩოვასთან და შვილებთან ერთად, ომის დაწყებიდან მალევე ისრაელში გაემგზავრა. მედიის ცნობით, ისინი ისრაელიდან ლატვიის ქალაქ იურმალაში გადავიდნენ.
კომენტარები