სინდისის 8 პატიმრის საქმეში, მოწმე პოლიციელი, ლევან ბასილაძე, რომელიც ბრალდების მხარემ წარადგინა, ქუთაისის საკრებულოს თავმჯდომარის პირველი მოადგილის, „ოცნების“ წევრის, გია ბასილაძის შვილია. ამის შესახებ განცხადება დღეს საქალაქო სასმართლოში მიმდინარე პროცესზე დაისვა.
„ბატონო ლევან, მამათქვენი ქუთაისის საკრებულოს თავმჯდომარის პირველი მოადგილეა?“, – ჰკითხა მოწმეს ადვოკატმა.
აღნიშნული შეკითხვა პროკურორმა გააპროტესტა-“საქმეს ეხება?“
ადვოკატის შეფასებით, ის, რომ მოწმის მამა არის „ქართული ოცნებიდან“ ქუთაისის საკრებულოს თავმჯდომარის მოადგილე, ცალსახად მიუთითებს მოწმის პოლიტიკურ მიკერძოებულობაზე.
ის, რომ მოწმის მამა არის „ოცნების“ არა მხოლოდ წევრი, არამედ საკრებულოს თავმჯდომარის პირველი მოადგილე, მიუთითებს მის პოლიტიკურ მიკერძოებულობაზე და მას, როგორც მოწმეს, აქვს მკაცრი ვალდებულება, იყოს როგორც პოლიტიკურად მიუკერძოებელი, გარდა იმისა, რომ უნდა იყოს მიუკერძოებელი, როგორც პოლიციელი.
გარდა იმისა, რომ მის მიერ არაერთხელ გამოვლენილი ცინიზმი ბრალდებულების მიმართ, მის მიერ ცუდად შეფარული სურვილი, რომ ჰქონდა მცდელობები, კითხვებს პასუხი არ გასცეს, ან არასრულად გასცეს, ჩემთვის ძალიან ნათელია; ამიტომ ამაზე პასუხი ძალიან მნიშვნელოვანია იმისთვის, რომ დადგინდეს, ეს მოწმე არის მიკერძოებული თუ შეგვიძლია, მას შევხედოთ, როგორც ნეიტრალურ მოწმეს… ვფიქრობ, მოწმის ობიექტურობის შესაფასებლად ეს მნიშვნელოვანი კითხვაა“, – განაცხადა ადვოკატმა.
მოსამართლე თამარ მჭედლიშვილმა შეკითხვა განარიდა და თქვა: მისი ოჯახი ვინ არის, რა არის და რას წარმოადგენს, საქმისთვის შემხებლობა არ აქვს, შეკითხვა არის განრიდებული.
მოწმეს ადვოკატის შეკითხვისთვის არ უპასუხია.
ცნობისთვის, ქუთაისის საკრებულოს თავმჯდომარის პირველი მოადგილე, გია ბასილაძე ამ პოსტს 2021 წლიდან იკავებს.
2020 წლიდან არის „ქართული ოცნება – დემოკრატიული საქართველოს“ ქუთაისის საოლქო ორგანიზაციის თავმჯდომარის მოვალეობის შემსრულებელი. წარსულში ის სატრანსპორტო და წყალმომარაგების კომპანიებში მუშაობდა.
კომენტარები