,,მაგდა ანიკაშვილი მოერევა თუ ოლგა სკაბეევა?“ – რომან გოცირიძე

დეპუტატი რომან გოცირიძე:

,,მაგდა ანიკაშვილი მოერევა თუ ოლგა სკაბეევა?

რა ბედი მაქვს მაინც-წელიწადში ერთხელ თუ გადავრთავ იმედზე, როცა სხვა არხს ვეძებ და მაინცდამაინც ჩემზე ლაპარაკს უნდა შევესწრო? ქალბატონმა მაგდამ, როგორც ყოველთვის, დამახინჯებული ფორმით მოჰყვა გუშინდელი ჩემი პოსტის შინაარსი-რომან გოცირიძე ეკლესიების მშენებლობის წინააღმდეგიაო. თქვენი ბრძნული აზრი მომახსენეთ, რას უნდა მივაწეროთ ესო-ეკითხება ბატონ მდინარაძეს. რას უპასუხებდა ამ კითხვაზე მეოცნებე დეპუტატი, ძნელი მისახვედრი არ არის. მასონების ისტორიის მოყოლა ვერ მოასწრო, თორემ დანარჩენი ყველა კონსპიროლოგიური თეორია ჩამოარაკრაკა ისე, როგორც დაგიბარებიათ. მაგდას ცრემლებიც კი მოადგა თვალზე, მაგრამ არ შეიმჩნია. ცოდნა უნდა ხომ ამასაც? ოლგა სკაბეევას არ გამოსდის ეს საქმე ასე ოსტატურად და თქვენ წარმოიდგინეთ, არც მარგარიტა სიმონიანს:))

რა ვთქვი სინამდვილეში: 300 ათასი ლარის ღირებულების ჯიპი რომ აჩუქა ვიღაც საქმოსანმა მღვდელს, ცოდვების გამოსასყიდად და მომავალი ცოდვების ჩადენის შესანდობად ეკლესია-ასლებს რომ აშენებენ ( მერე სახელმწიფომ რომ უნდა შეინახოს), ამას სჯობია სკოლები ააშენონ ან კულტურული მემკვიდრეობის ძეგლებს მოუარონ მეთქი. როცა 3000 მღვდელი სიღარიბის ზღვარზეა, ყოველგვარი სოციალური დაცვის გარანტიების გარეშე და მხოლოდ სასულიერო ელიტაა ფუფუნებაში, ამ პრობლემის მოგვარებას ეკლესიაში სწორი საფინანსო პოლიტიკის გატარება სჭირდება მეთქი.

რა არის ამ აზრში მკრეხელური?

სხვებს რომ ამუნათებენ, ჯერ საკუთარი ტელევიზიას მიხედონ. განა არ ვიცით, ნაკურთხი რომ არაა? ლოკოკინას მსგავსი მასონური ლოგო რომაა გამოსახული ეკრანზე, მარჯვნივ მაღალ კუთხეში, აგერ უკვე ოცი წელიწადია, ამასაც კარგად ხედავს ჯანსაღი საზოგადოება.

თქვე მართლა მასონებო, თქვენა!?”