ლოქდაუნი ბიზნესის დახურვას, სამსახურების დაკარგვას, დეპრესიას იწვევს – პრეზიდენტი ტრამპი ლოქდაუნს არ აპირებს

ამერიკის პრეზიდენტი, დონალდ ტრამპი, ამბობს, რომ მისი ადმინისტრაციის პირობებში, ქვეყნის ჩაკეტვა – ანუ გადაწყვეტილება ე.წ “ლოქდაუნზე” არ იქნება მიღებული.

დონალდ ტრამპის თქმით, ლოქდაუნმა, შეიძლება, საზოგადოებას ვირუსზე მძიმე შედეგი მოუტანოს, რადგან ასეთ დროს ადამიანები კარგავენ სამსახურებს, ეს კი მათ დეპრესიას იწვევს და სასმელზე ან ნარკოტიკზე დამოკიდებულებისკენ უბიძგებს.
“ეს ადმინისტრაცია ამერიკის ჩაკეტვის გადაწყვეტილებას არ მიიღებს. ლოქდაუნი სიცოცხლის ფასად ჯდება. ბევრ პრობლემას იწვევს, მკურნალობა კი, არ შეიძლება, საზოგადოებას პრობლემაზე ძვირად დაუჯდეს ეს და მე ბევრჯერ მითქვამს ამის შესახებ.

როდესაც ვხედავთ, რა ხდება ლოქდაუნის დროს – სამსახურების დაკარგვა, ნარკოტიკები, ალკოჰოლი, დეპრესია, ბიზნესის დახურვა – ეს საშინელებაა. ამიტომ, ეს ადმინისტრაცია ლოქდაუნის გადაწყვეტილებას არ იღებს, მაგრამ ჩვენ ვიქნებით ფხიზლად და ფრთხილად”, – თქვა ტრამპმა. 

ცნობისთვის, კორონავირუსის დადასტურებული შემთხვევების თვალსაზრისით, ამერიკა მსოფლიოში პირველ ადგილზეა. 

დღეს ამერიკაში კორონავირუსის 119, 584 შემთხვევა გამოვლინდა, ჯამში კი შტატებში 6,829,882 ადამიანი გამოჯანმრთელდა ვირურისგან.