“ლარს ხელისუფლების შეცვლა დაასტაბილურებს”

“ეს სისულელეც კი არ არის, ეს არის სისულელე კვადრატში“, – ასე აფასებს „ნაციონალური მოძრაობის“ წევრი რომან გოცირიძე ფინანსთა მინისტრის, ივანე მაჭავარიანის იმ განცხადებას, რომლის მიხედვითაც ლარის კურსის ვარდნა ოპოზიციის აქციებს უკავშირდება.

„დიახ, ხალხი არ ენდობა მთავრობას, ეს იწვევს ლარის გაუფასურებას. ლარის სტაბილურობა უკვე ვეღარ თავსდება ეკონომიკური პოლიტიკის ფარგლებში. პოლიტიკური ხელისუფლების შეცვლის გარდა, ლარის სტაბილურობას არაფერი უშველის“, – აცხადებს რომან გოცირიძე სააგენტო 2020NEWS-თან საუბრისას.

„ლარის კურსი ხელოვნურად ეჭირათ ოქტომბრის განმავლობაში და 200 მილიონ ლარზე მეტი გაყიდეს. 1 ნოემბერს ეროვნულმა ბანკმა ერთ დღეში 60 მილიონი დოლარი გაყიდა. ნაცვლად იმისა, რომ ლარი ამ ნიშნულზე მაინც გაჩერებულიყო, მკვეთრად დავარდა. ერთი ნაბიჯიც კი არ გადაუდგამს მთავრობას, ლარის სტაბილურობისათვის.

ერთადერთი, რასაც აკეთებენ, ეროვნული ბანკი ყიდის დოლარებს. ამასაც აკეთებს უგუნურად“, – აცხადებს რომან გოცირიძე.

შეგახსენებთ, ფინანსთა მინისტრმა ივანე მაჭავარიანმა ლარის კურსის გაუფასურება ოპოზიციას დააბრალა. როგორც მან მთავრობის ადმინისტრაციაში გამართულ ბრიფინგზე განაცხადა, ის პოლიტიკური პროცესი, რაც დღეს მიმდინარეობს და რადიკალიზმით ხასიათდება, შეუძლებელია, ლარის კურსზე არ აისახოს.