თვითმმართველობის არჩევნების შედეგებს და დედაქალაქში მეორე ტურის დანიშვნას სოციალურ ქსელში ეხმიანება ექსპერტი დავით ქართველიშვილი.
მისი თქმით, როდესაც თბილისელ ამომრჩეველთა მესამედი საღ გონებაზე და შეგნებურად არა მელიას, არა დედაქალაქის მერს, არამედ – მეგის ქარდავას ირჩევს ფაქტიურად, ასეთი ქალაქი სიცოცხლით უკვე მხოლოდ 45%-ით არის სავსე, დანარჩენ ნაწილს იქ სიცოცხლესთან საერთო არაფერი გააჩნია.
“მაინც ვერ მომინელებია…განა მეორე ტურზე ვნერვიულობ – იმ ყოველი მესამე თბილისელი ამომრჩევლის მოტივაცია გამაგებინა. მესმის – საპარლამენტო არჩევნები იყოს და შენი პარტიულ/სექტანტური პრიორიტეტები რომ დაგეფიქსირებინა. მაგრამ – ქალაქის მერობაზეა საუბარი, საიდანაც ერთმა გულწრფელად და ამომწურავად, ჯერ განვლილ 4 წელიწადში თავის გაკეთებულ საქმეებზე ჩაგაბარა ანგარიში და შემდეგ ასეთივე პროგრამული სკურპულოზურობით – მომდევნო 4 წელიწადში რას აპირებს, ისიც დაგიღეჭა. თანაც იმ დონეზე – წელს რომ პირველად, ოცნებასთან თავისი სკეპტიკური დამოკიდებულების მიუხედავად, ჩემმა უმცროსმა ვაჟმაც კი დიდი იმედით კალაძეს მისცა ხმა, როგორც მერს და არა პარტიის გენერალურ მდივანს და არა თუ უბრალოდ განიცდის ამ მეორე ტურის ამბავს, არამედ ვერ ვხვდება – რა კრიტერიუმით დაიწუნა თბილისელობამ მერი კახი კალაძე.
მოწინააღმდეგის ბანაკიდან რომ გაგვეგო რაიმე პროგრამული პაექრობის მსგავსი ელემენტები, რომ მაგალითად – “ჩემი გამარჯვების შემთხვევაში მე არა მწვანე, არამედ წითელი ფერის ავტობუსებს ჩამოვიყვან”, ან “კოჯორში არა ახალგაზრდულ, არამედ პენსიონერთა ცენტრს ავაშენებ”, ან და სულაც “ყოფილ იპოდრომზე არა ცენტრალურ პარკს განვათავსებ, არამედ ელიავას ბაზრობას გადმოვიტან” – კიდევ გაიგებდა კაცი, რატომ მელია. მაგრამ, როდესაც თბილისელ ამომრჩეველთა მესამედი საღ გონებაზე და შეგნებურად არა მელიას, არა დედაქალაქის მერს, არამედ – მეგის ქარდავას ირჩევს ფაქტიურად (რა მნიშვნელობაა – ის რომ დაეყენებინათ, ანალოგიურ შედეგს მივიღებდით), ასეთი ქალაქი სიცოცხლით უკვე მხოლოდ 45%-ით არის სავსე, დანარჩენ ნაწილს იქ სიცოცხლესთან საერთო არაფერი გააჩნია. და საკუთარ თავს ეგოისტურად კი ვულოცავ, რომ ასეთ ქალაქს გამოვეცალე, მაგრამ საყვარელი თბილისის, ჩემი შვილების თბილისის გამო, სადაც ლამის ყოველი მეორე ამომრჩეველი თურმე – ღია თუ ლატენტური სადისტი, მანიაკი, ფსიქოპატი, ნარკომანი და გაუკუღმართებული ცხოვრების წესის მიმდევარია – აქ მარტო ღრმა სევდა არა, აქ უკვე დიდი შიშის ფაქტორიც ირთვება…- წერს დავით ქართველიშვილი.
ცესკოს წინასწარი მონაცემებით, არჩევნების მეორე ტური 64-დან 20 მუნიციპალიტეტში გაიმართება, მათ შორის ხუთ დიდ თვითმმართველ ქალაქში: თბილისში, ქუთაისში, რუსთავში, ფოთსა და ბათუმში. დედაქალაქში მეორე ტურისთვის ნაციონალური მოძრაობის მერობის კანდიდატი ნიკა მელია და ქართული ოცნების მეორობის კანდიდატი კახა კალაძე იბრძოლებენ. მელიას 33.98%, ხოლო კალაძეს 44.97% აქვს.
კომენტარები