კრივში ოლიმპიური თამაშების ჩემპიონი და ორგზის მსოფლიო ჩემპიონი მძიმე წონით კატეგორიაში, ჯორჯ ფორმენი, მეტსახელად “დიდი ჯორჯი” 76 წლის ასაკში გარდაიცვალა. ინფორმაციას AbcNews-ი ავრცელებს.
ჯორჯ ფორმენმა ოქროს მედალი 1968 წლის ზაფხულის ოლიმპიურ თამაშებზე მოიგო. შემდეგ ის გახდა პროფესიონალი მოკრივე. მან მოიგო მსოფლიო ჩემპიონის ტიტული, მას შემდეგ, რაც 1973 წელს, იმ დროისთვის დაუმარცხებელი ჯო ფრეიზიერი დაამარცხა ნოკაუტით. ჩემპიონის ქამრის დაცვა მოახერხა ორჯერ, სანამ მუჰამედ ალისთან პირველი მარცხი არ განიცადა. 1977 წელს, ფორმენმა მოკრივის კარიერის დასრულების შესახებ განაცხადა.
სპორტიდან წასვლის შემდეგ, ფორმენი ქრისტიანი მღვდელი გახდა. 1994 წელს ის სპორტს დაუბრუნდა. 45 წლის ასაკში ნოკაუტით დაამარცხა 26 წლის მაიკლ მურერი და ერთდროულად სამი საჩემპიონო ქამარი მოიპოვა.
საჩემპიონო ქამარს ფორმენი ერთი წლის განმავლობაში ფლობდა, რითაც გახდა ყველაზე მხცოვანი მძიმეწონოსანი მსოფლიო ჩემპიონი კრივში. კარიერა მან 48 წლის ასაკში დაასრულა.
კომენტარები