,კრიპტოვალუტის ყველა მწარმოებელი, როგორც სხვა მეწარმე, დარეგისტრირდეს იურიდიულ პირად და გადაიხადონ გადასახადი ისევე, როგორც იხდიან კუბდარის მცხობელები, ქუდების მქსოველები თუ სტუმრების მასპინძლები“ – სოფიო ხორგუანი პარლამენტს და მთავრობას მიმართავს

„საქართველოს მთავრობა, საქართველოს პარლამენტი, პრობლემა თქვენი მოსაგვარებელია, მაგრამ დროულად, სანამ კონფლიქტად ქცეულა – სვანეთში ელექტროენერგიის დეფიციტის პრობლემას სახალხო დამცველის ყოფილი მოადგილე, უფლებადამცველი სოფიო ხორგუანი ეხმაურება:

ხორგუანი ამბობს, რომ გამოსავალი კრიპტოვალუტის ყველა მწარმოებლის იურიდიულ პირად დარეგისტრირებაშია.
„რაც შეეხება მაინერებს, ელნერგიის დეფიციტს სვანეთში და პრობლემის მოგვარებას
1. სვანეთში ყველა იურიდიულ პირს ელენერგია მიეწოდება ე.წ. სამფაზიანი სადენით, უდგას მრიცხველი და ყველა იურიდიული პირი იხდის ელენერგიის გადასახადს, ყველა.
2. კრიპტოვალუტის მწარმოებელი მაინერები ვისაც უდგას, იმ ოჯახებს ასევე ე.წ. სამფაზიანი სადენით ენერგოპროს მიერ მიეწოდება ელენერგია. რომლის საფასურს არ იხდიან, რადგან არ არიან იურიდიული პირები.
3. სხვა ოჯახები, რომლებსაც ელენერგია არ მიეწოდებათ ე.წ. სამფაზიანი სადენებით, სარგებლობენ შეღავათით ჰესების ზიანის სანაცვლოდ. გამოსავალი – კრიპტოვალუტის ყველა მწარმოებელი, როგორც სხვა მეწარმე, დარეგისტრირდეს იურიდიულ პირად და გადაიხადონ გადასახადი ისევე, როგორც იხდიან კუბდარის მცხობელები, ქუდების მქსოველები თუ სტუმრების მასპინძლები,“- წერს სოფიო ხორგუანი და საქართველოს მთავრობას პრობლემის დროულად მოგვარებისაკენ მოუწოდებს.

„საქართველოს მთავრობა, საქართველოს პარლამენტი, პრობლემა თქვენი მოსაგვარებელია, თუ უკეთესს გზას იპოვით, გამიხარდება. მაგრამ დროულად, სანამ კონფლიქტად ქცეულა. პასუხისმგებლობა თქვენზეა.
p.s. ღლიცინი კუთხურობაზე, სვანურ ხასიათზე, ხატზე დაფიცებასა და გაჭირვებაზე მარტივია,“- წერს სოფიო ხორგუანი.