უფლებადამცველი, ადვოკატთა ასოციაციის ყოფილი თავმჯდომარე, ზაზა ხატიაშვილი სოციალურ ქსელში მიმართვას ავრცელებს:
,,პატივცემულო კოლეგებო! გააზიარეთ!
მე, ზაზა ხატიაშვილმა ჩემს ოფიციალურ ფეისბუქგვერდზე შევქმენი რეესტრი — „ადვოკატი ადვოკატის უფლებებისთვის“, რადგან დღეს ადვოკატი საქართველოში დაუცველია. ჩვენ გადავწყვიტეთ, რამდენიმე ადვოკატი გავერთიანდეთ და ერთმანეთის უფლებები თავად დავიცვათ.
რეესტრში დარეგისტრირებული თითოეული ადვოკატის მიმართ საფრთხის წარმოშობის შემთხვევაში, ჩვენ, კოლეგები, ვალდებულნი ვიქნებით დავუდგეთ ერთმანეთს გვერდში ყოველგვარი ანაზღაურების გარეშე. ეს არის ღირსების, პროფესიის და ერთმანეთის დაცვის საკითხი.
კოლეგებო, მარტოდმარტო ვეღარ ვწვდები ამ ბრძოლას. წლებია, ყველა ადვოკატს ჩემი პირადი ხარჯებით ვიცავ, მაგრამ დღეს მდგომარეობა კატასტროფულია. ხშირად მომმართავენ კოლეგები, რომლებიც დაშინებულები, დამცირებულები და დაუცველები არიან.
გიზიარებთ რეალურ და უმძიმეს ფაქტს, რომლის გახმაურებაზეც თავად ადვოკატმა მომცა თანხმობა. ნათია ხუტიძე — კახეთის რეგიონში მოღვაწე ადვოკატი — კანონიერად შეძენილი საცხოვრებელი სახლისთვის გახდა დევნის ობიექტი. მოწინააღმდეგე მხარე მას არა მხოლოდ სასამართლოში ედავებოდა, არამედ ღიად ემუქრებოდა: „სახლს დაგიწვავ“.
პირველი ინსტანციის წაგების შემდეგ ნათია ხუტიძემ დახმარებისთვის მომმართა. სააპელაციო და საკასაციო სასამართლოებში დავა მოვიგე და სახლი ადვოკატს დავუბრუნე. თუმცა სამართალდამცავებმა ვერ — ან არ — დაიცვეს ადვოკატი. არაერთი მიმართვა, არაერთი სიგნალი, არაერთი გაფრთხილება უგულებელყოფილი დარჩა.
შედეგი?
ადვოკატს სახლი გადაუწვეს.
ნათია ხუტიძეს ჰყავს ორი მცირეწლოვანი შვილი. თუ ბავშვები სახლში იქნებოდნენ, ისინი ცოცხლად დაიწვებოდნენ. ეს უკვე აღარ არის მხოლოდ უყურადღებობა — ეს არის პირდაპირი პასუხისმგებლობა.
და მაინც, ახმეტის რაიონის პოლიციის უფროსი ლევან ოქრუაშვილი, მისი მოადგილე ბექა ახალაური და თელავის პროკურორი შოთა სარია დღემდე დაუსჯელები არიან. მიუხედავად იმისა, რომ ადვოკატი მათგან ითხოვდა დაცვას კონკრეტული, იდენტიფიცირებული მოძალადისგან.
ვკითხულობ ხმამაღლა და საჯაროდ:
თუ პოლიციელს ან პროკურორს დაემუქრებოდნენ სახლს დაგიწვავო (ღმერთმა ყველა დაიფაროს)— რეაგირება როგორი იქნებოდა?
დაიწყებოდა თუ არა ელვის სისწრაფით გამოძიება?
დაკავდებოდა თუ არა დამნაშავე?
და გაკეთდებოდა თუ არა განცხადება უმაღლეს დონეზე?
პასუხი ყველამ ვიცით.
საქართველოში ადვოკატის ინსტიტუტი ხელისუფლაბას ჩემი აზრით ეზიზღება, რადგან ადვოკატი იცავს ადამიანის უფლებებს — და ეს ბევრს არ აწყობს. მაგრამ როცა ადვოკატის შვილების სიცოცხლე საფრთხეშია და პასუხისმგებელი პირები კვლავ თანამდებობებზე სხედან, ეს უკვე სისტემური დანაშაულია.
კოლეგებო!
დროა გავერთიანდეთ. დროა საკუთარი თავი თავად დავიცვათ. ეს არ იქნება ფორმალური ორგანიზაცია, არ ეყოლება თავმჯდომარე, გამგეობა ან ბიუროკრატია. ეს იქნება სოლიდარობის გაერთიანება, რომლის ერთადერთი მიზანია — ერთმანეთის დაცვა.
ეს მეთოდი აპრობირებულია ევროპაში.
და დღეს ის საჭიროა საქართველოში, როგორც არასდროს.
ერთი ყველასთვის და ყველა ერთისთვის.“
კომენტარები