კლინიკა “ვივამედში” მიხეილ სააკაშვილის მოსანახულებლად სახალხო დამცველის კონსილიუმის წევრები შევიდნენ. როგორც ცნობილია, მათ შეხვედრა სურთ მიხეილ სააკაშვილის მკურნალ ექიმთან, ასევე ვივა მედის კლინიკურ დირექტორთან.
გარდა ამისა, კონსილიუმის წევრი ექიმები გასინჯავენ მიხეილ სააკაშვილს და შემდგომ, მისი ჯანმრთელობის მდგომარეობაზე დასკვნას მოამზადებენ.
როგორც მიხეილ სააკაშვილის დედა, გიული ალასანია ამბობს, კონსილიუმის დასკვნა მიხეილ სააკაშვილის საქმეს დაერთვება, რომელსაც ოჯახი სტრასბურგის სასამართლოში გაგზავნის.
“მისი წონა 61 კილოა. რა თქმა უნდა, ძალიან სუსტადაა, ადამიანი 24 საათი არ დგება, არ მოძრაობს ფაქტობრივად. ეს არის ადამიანი, რომელსაც ვერ დააბამდი ერთ ადგილას და ახლა ასეთ მდგომარეობაშია. მე არ ვიცი, რამ უნდა აიძულოს რომელმა თამაშმა და რომელმა მსახიობობამ. ეს კონსილიუმის ექიმები ალბათ იგივე ადამიანები არიან, ვინც ადრეც შედიოდა, ვიცი, რომ ესენი არიან ძალიან კარგი პროფესიონალები. პირადად მე არცერთს ვიცნობ, მაგრამ ვიცი, რომ კარგი ექიმები არიან, მჯერა, რომ ობიექტურები არიან და კარგია, რომ შევლენ და დაწერენ თავის დასკვნას. მე ასე წარმომიდგენია, რომ ესეც უნდა დაერთოს და თვითონ კლინიკის ცნობაც ალბათ, იმიტომ რომ ყველაზე დეტალური ინფორმაცია ამათ აქვთ, – თქვა გიული ალასანიამ.
შეგახსენებთ, სახალხო დამცველის კონსილიუმის წევრებმა მიხეილ სააკაშვილის ბოლოს 19 თებერვალს მოინახულეს.
კომენტარები