თბილისში, “რუსთაველის თეატრში” რუსეთის თეატრალური ხელოვნების ინსტიტუტის სტუდენტებმა „Победа 81”-ის ფარგლებში საზეიმო წარმოდგენა გამართეს. ინფორმაციას საქართველოში შვეიცარიის საელჩოში რუსეთის ინტერესების სექცია ავრცელებს და წერს:
„რუსეთის თეატრალური ხელოვნების ინსტიტუტის (ГИТИС) დამამთავრებელი კურსის სტუდენტებმა წარმოადგინეს ნათელი მუსიკალური და ქორეოგრაფიული კომპოზიციები ომის წლების სიმღერებზე. ლეგენდარულმა მელოდიებმა, როგორიცაა „კატიუშა“, „ბნელი ღამე“ და „ლურჯი ცხვირსახოცი“, მაყურებლის გულებში ყველაზე ცოცხალი გამოხმაურება ჰპოვა. მუსიკალური ნომრების გარდა, მსახიობები ღრმა განცდით კითხულობდნენ იმ დიდი ეპოქის პოეტებისა და მწერლების, კონსტანტინ სიმონოვის, ალექსანდრ ტვარდოვსკის, ასევე რობერტ როჟდესტვენსკისა და ვლადიმირ ვისოცკის, უკვდავ სტრიქონებს. საღამოს სტუმრები, დიპლომატიური კორპუსის, საქმიანი და სამეცნიერო წრეების, საზოგადოებრივი და კულტურული ორგანიზაციების წარმომადგენლები, ასევე რუსი თანამემამულეები, თითოეულ გამოსვლას აპლოდისმენტებით აცილებდნენ.
ჩვენი საერთო ისტორიის გმირული ფურცლების, დიდი სამამულო ომის შესახებ წმინდა პოეტური მოგონებები სამუდამოდ დარჩება რუსეთისა და საქართველოს ხალხების გულებში”, – წერია განცხადებაში.
რუსთაველის თეატრის დირექტორი გია თევზაძე, „ტვ პირველთან“ ამბობს, რომ სცენის დათმობის სანაცვლოდ, თეატრის ადმინისტრაციამ ფული აიღო. „რუსთაველის თეატრის” დირექტორი აღნიშნავს, რომ 9 მაისის თემატიკა მას უხერხულობას არ უქმნის.
„ჩვენ იჯარით მივეცით დარბაზი, მაქსიმალური თანხა ავიღეთ, იქ ისეთი არაფერი არ იყო, სტუდენტები იყვნენ ГИТИС-ის.
ჩვენ არავინ დაგვიკარგავს ამ ომში? [მეორე მსოფლიო ომში]… ჩვენ ყველაზე მეტი დავკარგეთ ამ ომში. რა საკვირველია, კიდევ რომ დასჭირდეთ, თეატრის დარბაზს კიდევ მივაქირავებთ ფულის გამო”- თქვა გია თევზაძემ.
კითხვაზე, როცა პროევროპულ აქციებზე სიარულის გამო მსახიობებს თეატრიდან უშვებენ, რამდენად მართებულია, რუსი სტუდენტებისთბის დარბაზის მიქირავება, თეატრის დირექტორი ამბობს: “იმ მსახიობს ჰკითხეთ, როგორ უნდოდა ამ თეატრიდან წასვლა”.
კომენტარები