„ხომ შეიძლება ისე მოიტყუო, რომ სასაცილოდ მაინც არ გამოიყურებოდე“ – დიმიტრი გუდკოვი ბრალდებებს უარყოფს

რუსი ოპოზიციონერი დმიტრი გუდკოვი ქვეყანაში არშემოშვებასთან დაკავშირებით საქართველოს პარლამენტის საგარეო ურთიერთობა კომიტეტის თავმჯდომარე ნიკოლოზ სამხარაძის განცხადებას პასუხობს.

,,ვულოცავ საქართველოს ხელისუფლებას ამ ტყუილს. ისინი დიდხანს ფიქრობდნენ, როგორ აეხსნათ, რატომ არ შემიძლია ხინკლის ჭამა მშვიდობის ხიდის ხედის ფონზე – და, როგორც იქნა, მოიფიქრეს“, – ამბობს ოპოზიციონერი საკუთარ „ფეისბუქ“ გვერდზე გამოქვეყენებულ ვიდეო მიმართვაში.

დმიტრი გუდკოვი ნიკოლოზ სამხარის სიტყვებს ციტირებს და ამბობს, რომ არშეშვების მიზეზად ორი არგუმენტი დაასახელეს.

,,პირველი, ეს იყო ის, რომ ვიყავი „სახელმწიფო სათათბიროს დეპუტატი, რომელმაც აღიარა აფხაზეთისა და ცხინვალის რეგიონის დამოუკიდებლობა“. მეორე, იმიტომ , რომ ნავალნიმ ქართველებს შეურაცხყოფა მიაყენა 2008 წელს. რასაც ვპასუხობ:

აფხაზეთის დამოუკიდებლობა სახელმწიფო დუმამ 2008 წელს ცნო. დეპუტატი 2011 წელს გავხდი. 2008 წლიდან კი, როცა საქართველოში ოკუპირებული ტერიტორიების შესახებ კანონი მიიღეს, არც აფხაზეთში და არც სამხრეთ ოსეთში საქართველოს ტერიტორიული მთლიანობის პატივისცემის გამო ერთხელაც კი აღარ ვყოფილვარ. გარდა ამისა, სახელმწიფო სათათბიროს დეპუტატ გავრილოვისგან განსხვავებით, რომელიც აფხაზეთისა და სამხრეთ ოსეთის დამოუკიდებლობის მომხრეა, მე არ დამიკავებია საქართველოს პარლამენტის თავმჯდომარის ადგილი – როგორც გვახსოვს, საქართველოს ხელისუფლებამ ეს დეპუტატი გახარებულმა მიიღო.

მე მქვია დიმიტრი გუდკოვი და არა ალექსეი ნავალნი. მე მესმის, რომ ახლა საქართველოს ხელისუფლებისთვის ძალიან მნიშვნელოვანია პუტინს თავი მოაწონოს. სააკაშვილის დაპატიმრება საკმარისი არ არის,როგორც ჩანს საჭიროა კიდევ არაერთი რიტუალური ჟესტი მოახლოებული არჩევნებისთვის ფინანსური მხარდაჭერის მისაღებად. მაგრამ ხომ შეიძლება ისე მოიტყუო, რომ სასაცილოდ მაინც არ გამოიყურებოდე“, – ამბობს გუდკოვი.

რუსი ოპოზიციონერი სამხარაძეს კითხვით მიმართავს.

,, „ლიუბოვ სობოლიც სახელმწიფო სათათბიროს დეპუტატი იყო? იგორ კოჩეტკოვსაც ნავალნი ჰქვია? შეგახსენებთ, რომ არც ისინი შემოუშვეს საქართველოში. დამთხვევაა? – ალბათ“.

მისი თქმით, ის პატივს სცემს საქართველოს ტერიტორიული მთლიანობას, ქართველ ხალხს და მისი სწრაფვას ევროპისკენ.

,, მძულს პუტინის წინაშე მსახურებისკენ მისწრაფება და ტყუილი. ორივე ჩვენი ქვეყანა აუცილებლად იქნება თავისუფალი და დემოკრატიული“, -აღნიშნავს დმიტრო გუდკოვი.

ცნობისთვის, საგარეო ურთიერთობათა კომიტეტის თავმჯდომარემ, ნიკოლოზ სამხარაძემ რუსი ოპოზიციონერის, დმიტრი გუდკოვის ქვეყანაში არშემოშვებასთან დაკავშირებით თქვა, რომ ის იყო იმ დუმის წევრი, რომელმაც აფხაზეთისა და ცხინვალის დამოუკიდებლობა აღიარა.

ipn.ge