ხობში მდებარე ახალაშენებული კორპუსის მეპატრონე, თამაზ ბასილაია შენობაში კანალიზაციის ქსელის არარსებობას უარყოფს. მან დღეს კორპუსის შიდა სივრცის გადასაღებად მედიის წარმომადგენლები მიიწვია.
მეპატრონემ შენობა სახელმწიფოსგან 100 ათას ლარად შეიძინა, რის შემდეგაც იქ დაახლოებით 2 მილიონის ინვესტიცია განახორციელა.
შენობაში გაყვანილია როგორც საკანალიზაციო, ისე წყლის მილები, პრობლემა კი რეალურად ის არის, რომ ზუგდიდის გარდა სამეგრელოს რეგიონში, მათ შორის ხობში, ახალი საკანალიზაციო სისტემა არ გაკეთებულა. შესაბამისად, მილები 30 წლის წინ გაკეთებულ სისტემაზეა დაერთებული, რომელიც მდინარეში ჩადის.
რაც შეეხება ინფორმაციას, რომ თითქოს საკანალიზაციო მილების არარსებობის გამო, ბინების გაყიდვა ვერ მოხერხდა, მეპატრონე განმარტავს, რომ არა ცალკეულ ბინებს, არამედ მთლიან შენობას ყიდის.
ამასთან დაკავშირებით ის დევნილთა სამინისტროსთან მოლაპარაკებებს აწარმოებს. ამბობს, რომ თუ ფასზე ვერ შეთანხმდებიან, შესაძლოა შენობაში სასტუმრო გახსნას.
თამაზ ბასილაიას თქმით, ხობში კანალიზაციის გაკეთება ერთ-ერთ უმნიშვნელოვანესი საკითხია, რომელიც უნდა მოგვარებულიყო, თუმცა არც დეპუტატს და არც რაიონის ხელმძღვანელობას ამ საკითხზე დღემდე არ უზრუნია.
ამის პარალელურად, ხობის ცენტრში ხელისუფლებამ გახსენა პარკი, რომლის მოწყობაზეც 2 მილიონამდე ლარი დაიხარჯა, კიდევ სამ მილიონზე მეტი თანხას დახარჯვას მის გასაფართოებლად გეგმავენ.
შეგახსენებთ, ახალაშენებულ კორპუსში საკანალიზაციო მილების არარსებობის შესახებ ინფორმაცია მედიაში გუშინ გავრცელდა.
კომენტარები