ხმაური და დაპირისპირება იყო იურიდიულ საკითხთა კომიტეტზე, სადაც განხილვის მთავარი საკითხი მამუკა მდინარაძისთვის ახალი თანამდებობის შექმნა იყო. კომიტეტის დარბაზში ვითარება მას შემდეგ დაიძაბა, რაც გახარიას პარტიის წევრმა თქვა, რომ ვერ ხსნის, როგორ შეიძლებოდა მთელი ამ ხნის განმავლობაში “ოცნების” წევრებს მდინარაძის ეფექტურობაზე ესაუბრათ, შემდეგ კი მოულოდნელად ის მთავრობის ადმინისტრაციაში გადაეყვანათ.
6 თვეში გენერლად დაწინაურებულ მამუკა მდინარაძეს, რომელიც ერთ დღეში გადაიყვანეს და შეუთავსეს კოორდინატორობა, ფაქტობრივად, აპარატიც კი არ ეყოლება იმისთვის, რომ ეფექტურად განახორციელოს ეს კოორდინაცია. მაშინ, როდესაც მთელი გუნდი მდინარაძის ეფექტურობაზე საუბრობდა, ერთ დღეში, ფაქტობრივად, კოორდინატორობამდე დააქვეითეს, – თქვა გიგა ფარულავამ კომიტეტის სხდომაზე.
აღნიშნულმა განცხადებამ “ოცნების” დეპუტატების გაღიზიანება გამოიწვია. არჩილ გორდულაძემ გიგა ფარულავას რამდენჯერმე მიკროფონიც კი გაუთიშა და ბოლოს დარბაზიდან გაძევებით დაემუქრა.
მოგიწოდებთ, რომ ლექსიკას გაუფრთხილდეთ რა ლექსიკას ხმარობთ, იყენებთ, როდესაც ხართ საქართველოს პარლამენტის იურიდიულ საკითხთა კომიტეტზე. ტონს გაუფრთხილდით და სიტყვები შეარჩიეთ, – თქვა გორდულაძემ.
გორდულაძის შენიშვნას თავის მხრივ, უპასუხა ფარულავამაც.
ტონს თავად გაუფრთხილით. ვსაუბრობ განმარტებით ბარათში მითითებული სიტყვებით და ტერმინებით, სადაც თქვენს მიერ შემოღებულ სახელმწიფო მინისტრს პირდაპირ კოორდინატორის ფუნქცია ეძლევა. შესაბამისად, ლექსიკას, პირველ რიგში, თქვენ გაუფრთხილდით და ჩემს ტონზე თქვენ ნუ ინრევიულებთ, – თქვა ფარულავამ. (ტვპირველი)
კომენტარები