რუსეთის სამთავრობო-პროპაგანდისტულმა მედიამ, РИА Новости-მ გაავრცელა ინფორმაცია, რომ რუსეთის მიერ ოკუპირებული ხერსონისა და ზაპოროჟიეს ოლქები, უკრაინული სატელეფონო კოდის – +380-ის ნაცვლად, რუსული კოდის – +7-ის ხმარებაზე გადაჰყავთ.
რუსულ პროპაგანდისტულ მედიასთან ოკუპირებული ყირიმის ე.წ. საინფორმაციო პოლიტიკის მეთაურის მრჩეველმა თქვა, რომ ხერსონსა და ზაპოროჟიეში ახალი სატელეფონო ოპერატორები უკვე მუშაობენ.
ზაპოროჟიეში რუსეთის მიერ დანიშნული მარიონეტული ადმინისტრაციის წარმომადგენლის თქმით, უკვე გაყიდვაშია რუსულნომრიანი სიმ-ბარათები.
“ზაპოროჟიეს ოლქი გადადის რუსულ სატელეფონო კოდ “+7″-ზე. რეგიონში უკვე შემოვიდა სატელეფონო კავშირის ახალი ოპერატორი. უკვე გაყიდვაშია სიმ-ბარათები ნომრებით, რომლებიც +7-ით იწყება”. – თქვა მარიონეტული რეჟიმის წარმომადგენელმა.
მაისის დასაწყისში ე.წ. დონეცკისა და ლუგანსკის სახალხო რესპუბლიკების კონტროლის ქვეშ მყოფი ტერიტორიებიც რუსულ სატელეფონო კოდზე გადავიდნენ.
კომენტარები