ლევან ჯავახიშვილი, „ალია“
„ალიას“ ესაუბრება ექსპერტი, გია ხუხაშვილი.
– სააკაშვილი მშიშარა ნამდვილად არ არის. ხელისუფლების ამოცანა იყო, მორალურად დაემცირებინა სააკაშვილი. იმ კადრების გამოქვეყნებით, უკუშედეგი მიიღო. ვისთვისაც სააკაშვილი მიუღებელია, იმათაც კი დაინახეს, რომ რაღაც ისე იქცევა ეს კაცი, ვაჟკაცურად… შესაბამისად, ვფიქრობ, რომ ხელისუფლება შეცდომას უშვებს ამ პროცესში. თავი გავანებოთ, რომ კანონს არღვევენ, იმ კადრებს აქვეყნებენ, რომელთა გამოქვეყნების უფლებაც არ ჰქონდათ. მათი ამოცანა მაინც ვერ სრულდება. სააკაშვილის მორალურ განადგურებას ვერ მიაღწიეს. ვერც მეორე მიზანს მიაღწიეს. მეორე მიზანი ის იყო, რომ ამ სააკაშვილის შიმშილობის ფონზე, გამოეწვიათ ოპოზიცია, მკვეთრი ნაბიჯები გადაედგა მერე ოპოზიციას, რითაც შეიქმნებოდა ფორმალური საფუძველი, რომ გამოეყვანათ პოლიცია და ეცემათ ოპოზიციურად განწყობილი ხალხი, დაეჭირათ, მათ შორის, ლიდერები.
– სააკაშვილი რომ დაიღუპოს, რამდენად მოსალოდნელია, რომ უმართავი პროცესები დაიწყოს და საქმე სამოქალაქო დაპირისპირებამდე მივიდეს?
– ეს წარმოუდგენელი სცენარია, მაგ სცენარს არც განვიხილავ. შეიძლება ითქვას, რომ ხელისუფლება ცეცხლს ეთამაშება. სააკაშვილის დამცირებით, აგდებული კომენტარებით მის პროვოცირებას ახდენს. რომ სააკაშვილმა მოახდინოს თავისი მდგომარეობის რადიკალიზაცია. ხელისუფლებას თითქოს არ სჯერა, რომ სააკაშვილი შიმშილით მოკვდება. ასეთი დამიკიდებულება აქვთ მის მიმართ და ამიტომ მიდიან ვა–ბანკზე. ჩვენ უნდა გვესმოდეს, რომ ადამიანის ორგანიზმს შეზღუდული შესაძლებლობები აქვს და ნებისმიერ მომენტში შეიძლება დაიწყოს შეუქცევადი პროცესები. ჩვენ არ ვიცით, ეს როდის დაიწყება და დაიწყება თუ არა. თუმცა, ადამიანის სიცოცხლით ასე თამაში წარმოუდგენელია. მით უმეტეს, როდესაც მეორე მხარე პირობას სდებს, თუ სააკაშვილს გადაიყვანენ სამოქალაქო კლინიკაში, იმ კლინიკას ახლოს არ გაეკარებიან. ამ დროს ხელისუფლება მაინც ჯიუტად იძახის, არ გადავიყვანთო, ეს ძალიან სერიოზული პრობლემაა. რა შეიძლება მოხდეს მოვლენების ფატალური განვითარების შემდეგ? მე ვფიქრობ, ამის მერე ხელისუფლება დელეგიტიმილიზებული იქნება. მიუხედავად იმისა, შეინარჩუნებს თუ არა ძალაუფლებას, ისტორიაში ეს იმხელა შავი ლაქა იქნება, ეს იქნება საშვილიშვილო კომპრომატი ამ ხელისუფლების წარმომადგენლებისთვის. მით უმეტეს იმ ფონზე, როდესაც ასე ცინიკურად უდგებიან ამ საკითხს. სააკაშვილი ავტორიტეტია საზოგადოების ერთი ნაწილისთვის, მაგრამ ის არ არის ავტორიტეტი საზოგადოების უმრავლესობისთვის. მოვლენების ფატალური განვითარება, ისედაც სუსტი ლეგიტიმაციის ხელისუფლებისთვის იქნება ძალიან პრობლემატური… ხელისუფლებას აწყობს, დილიდან საღამომდე სააკაშვილზე რომ არის ლაპარაკი და ამ დაგროვილ თემებზე ხმას აღარავინ იღებს. არ არის ლაპარაკი გაზრდილ ტარიფებზე, დამძიმებულ სამომხმარებლო კალათაზე, ლარის კატასტროფულ გაუფასურებაზე… ყოველ დღე ათობით ადამიანი იღუპება კოვიდით. ამ ადამიანებს შეეძლოთ ეცოცხლათ კიდევ დიდხანს და ესეც ხელისუფლების კისერზეა. ამაზე აღარავინ ლაპარაკობს, თითქოს ეს თემები აღარ არსებობს. დამერწმუნათ, მოსახლების უმრავლესობას ეს უფრო აწუხებს. სააკაშვილის სიცოცხლე ძალიან მნიშვნელოვანია, მაგრამ ის გარდაცვლილები, რა, ადამიანები არ იყვნენ? და რამდენი ასეთი 80 და მეტი ადამიანი იღუპება კოვიდით ყოველდღე? ეს თითქოს პრობლემა არ არის და თითქოს ეს არ არის ხელისუფლების კომპრომატი, თითქოს მერე რა მოხდა. ასე უდგება ოპოზიცია ამ და სხვა უმნიშვნელოვანეს საკითხებს და საერთოდ არ ლაპარაკობენ ამაზე.
კომენტარები