პოლიტიკური დისკუსიის საგანია მამუკა ხაზარაძის ინტერვიუ. შტატებში ვიზიტის შემდეგ, “ამერიკის ხმასთან” ინტერვიუს დროს, “ლელოს” ლიდერმა სანქცირების საკითხზე ისაუბრა და თქვა, რომ არ სურს, ვინმე დასანქცირებული იხილოს, თუმცა როდესაც ლაპარაკია ქვეყნის ეროვნულ ინტერესზე, ყველა მეთოდი მისასალმებელია. საუბარია ხელისუფლების წარმომადგენლების დასანქცირებაზე, რაც “ქართული ოცნების” მხრიდან მწვავე კრიტიკის საფუძველი გახდა. სანქცირების საკითხზე განსხვავებული შეფასებებია ოპოზიციაში.
“ქართული ოცნების” თავმჯდომარის, ირაკლი კობახიძის განცხადებით, ამ ადამიანების თვითმიზანი მხოლოდ და მხოლოდ სახელმწიფო ინტერესების დაზიანებაა.
“ხაზარაძის განცხადებიდან ჩანს, რომ მთლიანად რადიკალური ოპოზიცია გადართულია სახელმწიფოს დაზიანებაზე, მეტი ინტერესი არ აქვთ, ამის გაგრძელებაა მისი ეს განცხადება, რომელიც უკავშირდება ხელისუფლების წარმომადგენლების, თუ სხვა პირების დასანქცირებას. სხვა ახსნა ამას უბრალოდ არ აქვს. ამ ვითარებაში, როდესაც ევროკომისიამ გასცა დადებითი პასუხის კანდიდატის სტატუსის მინიჭებასთან დაკავშირებით, ევროპულმა საბჭომ ცოტა ხანში უნდა მიიღოს საბოლოო გადაწყვეტილება, ამ ფონზე, როდესაც შენ ცდილობ, რომ ვიღაცების დასანქცირება უზრუნველყო, ეს, რა თქმა უნდა, მეტყველებს იმაზე, რომ ამ ადამიანების თვითმიზანია სახელმწიფოს დაზიანება”, – განაცხადა ირაკლი კობახიძემ.
კომენტარები