ექსპერტი გია ხუხაშვილი სოციალურ ქსელში პოსტს აქვეყნებს.
“როგორ იქცევა “ჭკვიანი” ხელისუფალი, რომელსაც ისე უნდა ისარგებლოს ძალაუფლებით, რომ თვითონ კორუფციაში არ იყოს გარეული?
შემოიკრებს ირგვლივ ხარბ მედროვეებს და შეუქმნის მათ დაუსჯელობის ილუზიას. ძალაუფლებით აღჭურვილი ადამიანი ფულის შოვნაში განსაკუთრებით “ეფექტურია”, თუ მას გონია, რომ რასაც იშოვის მისია. ამათმაც კარგად “იმუშავეს” და დიდი ფული გაჭრეს.
და, აი, დადგა მოსუქებული ცხვრების პარსვის დრო და სპეციალურად ამ დღისთვის კარგად გამოწვრთნილი და “სუფთად” შემონახული ბიჭის ხელით “მატყლი” შეაგროვა. ამ პროცესში, მისმა მპარსავმა ვიღაცას ყელი გამოჭრა, ვიღაცა გაატყავა.
თან, რაც მთავარია, რამე რომ იყოს, თვითონ არაფერ შუაშია, იმ ბიჭის ბრალია ყველაფერი. კარგად ამუშავებს და მერე იმასაც დასჯის “სისასტიკისთვის”. გადარჩენილი ცხვრები კი მისი საუკუნოდ მადლიერი იქნებიან.
ნამდვილი პროფესიონალი მწყემსია რა, ცხვრების ფარაში…”, – წერს ის.
სავარაუდოდ, ხუხაშვილი გულისხმობს სამართალდამცველების მიერ ეკონომიკის და მდგრადი განვითარების მინისტრის ყოფილი პირველი მოადგილის რომეო მიქაუტაძის დაკავებას. მას ბრალდება საქართველოს სისხლის სამართლის კოდექსის 332-ე მუხლის მე-2 ნაწილით და 194-ე მუხლის მე-3 ნაწილის “გ’’ ქვეპუნქტით წარედგინა, რაც სასჯელის სახედ და ზომად 12 წლამდე პატიმრობას ითვალისწინებს.
ცნობისთვის, რომეო მიქაუტაძე სახელმწიფო უსაფრთხოების სამსახურმა დააკავა. უწყების ცნობით, მიქაუტაძე თანამდებობრივ გავლენას, სანაცნობო წრესა და გამოცდილებას პირადი სარგებლის მიღების მიზნით უკანონოდ იყენებდა ენერგეტიკულ სფეროში სხვადასხვა პირისთვის არამართლზომიერი უპირატესობის მისანიჭებლად. ამ პირებისთვის უკანონო დახმარების გაწევის სანაცვლოდ კი ის მათგან ენერგოკომპანიებში (ჰესებში) საწარმოს წილებს იღებდა, რომელთა რეალური მესაკუთრე თვითონ იყო, ხოლო წილები ოფიციალურად თავისი ნდობით აღჭურვილ პირებზე ჰქონდა გაფორმებული.
უწყების ცნობითვე, მიქაუტაძე საქართველოს ეკონომიკისა და მდგრადი განვითარების სამინისტროს მაღალ თანამდებობაზე ყოფნის პერიოდში, საჯარო ინტერესის საწინააღმდეგოდ, თავისთვის ან სხვისთვის გამორჩენის ან უპირატესობის მისაღებად, სამსახურებრივ უფლებამოსილებას სისტემატურად ბოროტად იყენებდა, რამაც სახელმწიფოს კანონიერი ინტერესის არსებითი დარღვევა გამოიწვია.
სუს-ის ინფორმაციით, ზემოაღნიშნული უკანონო საქმიანობის შედეგად მიქაუტაძის ოჯახის ქონებრივი მდგომარეობა შესაბამის თანამდებობებზე მისი განწესების შემდეგ მილიონობით ლარით გაიზარდა.
უწყების ცნობით, გამოვლენილია ესპანეთის დედაქალაქ მადრიდში მდებარე საცხოვრებელი ბინის ზემოაღნიშნული უკანონო და დაუსაბუთებელი შემოსავლით 600 000 ევროდ შეძენის ფაქტი. ამასთანავე, მან, მის მიერ მიღებული განსაკუთრებით დიდი ოდენობით უკანონო ან/და დაუსაბუთებელი ქონების წარმოშობის წყაროს დამალვისა და შენიღბვის მიზნით, მილიონ ლარამდე ღირებულების მქონე 2 ერთეული ავტომობილი მისი და თავისი ოჯახის წევრის ნდობით აღჭურვილ პირებზე გააფორმა.
სუს-ის განმარტებით, გამოძიების პროცესში კიდევ უფრო დაზუსტდება როგორც მიქაუტაძის მიერ შემოსავლების უკანონო გზებით მიღების გარემოებები, ისე ამ შემოსავლების ლეგალიზაციის ეპიზოდები.
შეგახსენებთ, რომეო მიქაუტაძე ეკონომიკისა და მდგრადი განვითარების მინისტრის მოადგილის თანამდებობას 2021 წლიდან იკავებდა, პირველი მოადგილე კი 2022 წლის 30 დეკემბრიდან გახდა. ის ამ პოსტს 2024 წლის 11 თებერვლამდე იკავებდა.
კულუარულად ვრცელდება ინფორმაცია, რომ მიქაუტაძე მარტო არ იქნება და ხელისუფლება საკუთარ რიგებში კიდევ გეგმავს რიგი ყოფილი თუ ამჟამინდელი თანამდებობის პირების დაკავებას.
კომენტარები