“კალაძის საპირწონე გახარია კი არა, სუსის ხელმძღვანელი ხდება”

„ქართულ ოცნებაში“ გავლენებისთვის ბრძოლა ახალ და გადამწყვეტ ფაზაში შედის. ახლა ძირითადი მოთამაშეები დედაქალაქის მერი კახა კალაძე და სუსის უფროსი გრიგოლ ლილუაშვილი იქნებიან.

“კახა კალაძე ცდილობს თეთრი ყვავი იყოს. ის უკვე დიდი ხანია, ცალკე სუბიექტია „ქართულ ოცნებაში“, მაგრამ გახდება თუ არა დამოუკიდებელი – საეჭვოა. რაც შეეხება „ოცნების“ ახალ სახეებს, მათი შერჩევის პროცესში საკმაო გავლენა სუსის უფროსს, გრიგოლ ლილუაშვილს ექნება“ –

ასე აფასებს პოლიტიკური მოძრაობა, „ტრიბუნას“ ლიდერი, დავით ჭიჭინაძე, „ქართული ოცნების“ მიერ დაანონსებულ ახალი სახეებით გადახალისებას და თვლის, რომ 2016 წლის საგურამოს შემადგენლობის პომპეზური პრეზენტაციის შემდეგ, „ოცნებაში“ აღარც თავისუფალი ადამიანი შემორჩა და არც მეტ-ნაკლებად მოაზროვნე.

მისივე თქმით, მომავალ პოლიტიკური რეალობაში პრემიერი გიორგი გახარია არ ჩანს.

„გიორგი გახარია არც ფიგურაა და არც გუნდური მოთამაშე. შესაბამისად, ის ვერც გუნდს შეკრებს. რასაც ვერ ვიტყოდი კალაძეზე. კალაძეს ამ შემთხვევაში ალბათ ფეხბურთმა უშველა, ამბიციაც მეტი გააჩნია და თუ კანონი არ შეიცვალა და თავისი 22 მაჟორიტარით დარჩა თბილისში, გაცილებით მეტი გავლენა ექნება „ოცნებაში“ მყოფ ნებისმიერ ადამიანზე. შესაბამისად, იგი ივანიშვილისთვისაც უფრო სახიფათო გახდება.

მოკლედ, ივანიშვილს კვირიკაშვილთან უკვე ჰქონდა „მწარე გამოცდილება. ამიტომ ვფიქრობ, რომ ამ ეტაპზე, ახალი გუნდის არჩევაში, ლილუაშვილს ექნება ყველაზე დიდი გავლენა.

არც ის არის გამორიცხული, თავადაც გახდეს პოლიტიკური ფიგურა. მითუმეტეს, რომ ლილუაშვილს უკვე აქვს სერიოზული კულუარული გავლენებიც და პოლიტიკური გამოცდილებაც. ანუ, კალაძის საპირწონე ამ შემთხვევაში გახარია კი არა, სუსის ხელმძღვანელი ხდება. თუ რა თქმა უნდა, კახა კალაძემ კიდევ რამე მსგავსი არ „მოუწყო“, რაც ერთხელ უკვე გააკეთა კომპანია „სვეტთან“ მიმართებაში“