შემოქმედის ეპარქიის მღვდელმსახური, ჯუმათის მთავარანგელოზთა სახელობის მამათა მონასტრის წინამძღვარი, არქიმანდრიტი მიქაელ მიგინეიშვილი 60 წლის ასაკში გარდაიცვალა. ინფორმაციას „საპატრიარქოს უწყებანი“ ავრცელებს.
მათივე ცნობით, არქიმანდრიტ მიქაელს სამშაბათს, 2021 წლის 23 ნოემბერს, ჯუმათის მამათა მონასტერში დაკრძალავენ.
„მამა მიქაელი თავისი სასულიერო მოღვაწეობის პერიოდში საქართველოს სხვადასხვა ეკლესია-მონასტერში მსახურობდა, ბოლო 24 წლის განმავლობაში იგი ჯუმათის მამათა მონასტრის წინამძღვარი იყო.
მწუხარებას გამოვთქვამთ არქიმანდრიტ მიქაელის გარდაცვალების გამო და თანავუგრძნობთ განსვენებულის ოჯახს, ახლობლებს, მონასტრის წევრებსა და სამწყსოსს.
უფალმა სავანესა მართალთასა დააწესოს მისი უკვდავი სული.
გთხოვთ, ლოცვებში მოიხსენიოთ ახლად შესვენებული არქიმანდრიტი მიქაელი“, – წერია გავრცელებულ ინფორმაციაში.
კომენტარები