აჭარის ავტონომიური რესპუბლიკის ჯანდაცვის ყოფილი მინისტრი, ქობულეთის მუნიციპალიტეტის მაჟორიტარი დეპუტატი ზაალ მიქელაძე იმ პარლამენტართა ჩამონათვალში მოხვდა, რომელიც „ფლანგვის დეტექტორმა“ გამოაქვეყნა. მათი თქმით, აღნიშნულ დეპუტატებს წლის მანძილზე ერთხელაც კი არ ჩაურთავთ მიკროფონი.
ზაალ მიქელაძე „აიპრესით“ იმ ადამიანებს პასუხობს, რომლებსაც მისი სადეპუტატო საქმიანობა მხოლოდ მიკროფონის ხელის დაჭერა გონიათ.
„მე ტვ პირველის ჟურნალისტებსაც ვუთხარი და ახლაც იგივეს გავიმეორებ, ვისაც აინტერესებს რას ნიშნავს საპარლამენტო მუშაობა, უნდა ჩაიხედონ დებულებებში და ნახონ განმარტება. თუ თქვენ მიგაჩნიათ ტრიბუნაზე ახტომა საპარლამენტო მუშაობად… ეს შეიძლება ვიღაცას პიარისთვის სჭირდება, ადიან რომ გამოვიდნენ სიტყვით. მე ასეთი გამოსვლა არ მქონია.
საპარლამენტო მუშაობა არის კაბინეტში მუშაობა, პროგრამებზე და კანონებზე მუშაობა, რითაც ახლაც ვარ დაკავებული. ერთ-ერთ კანონზე ვმუშაობთ.
ვისაც როგორ უნდა ისე წარმოაჩინოს, ნაკლებად ვნერვიულობ მსგავს კითხვებზე, იმიტომ რომ ჩემი წინა ცხოვრებით ყოველთვის ვთვლიდი და ზუსტად ვიცოდი, რა იყო რეალური სამუშაო მინისტრის, დეპუტატის თუ ექიმის რანგში.
იქ იყო საკეთებელი კონკრეტული საქმე. ტრიბუნა არც მინისტრობის დროს გამომიყენებია, მხოლოდ განსაკუთრებული საჭიროების დროს. ვის დავუსვა კითხვა, თუნდაც მინისტრის მოადგილეს რაზე დავუსვა კითხვა?! იმუნიზაციაზე, პროგრამაზე თუ რაზე, როცა ეს ყველაფერი მე თვითონ მაქვს გავლილი, გადაღეჭილი და იქით გავცემ ნებისმიერ კითხვის დამსმელს პასუხს.
უხერხულია მინისტრს ან მის მოადგილეს ეს კითხვა დავუსვა.
რაც შეეხება სხვა დარგებს, მე ისეთ კითხვას არ დავსვამ, რაშიც ძალიან კარგად არ ვარ ჩახედული.
თუ ისინი თვლიან, რომ კითხვა უნდა დაისვას საჩვენებლად, სატელევიზიოდ და სარეკლამოდ, მე მაგ კატეგორიას არ განვეკუთვნები.
ჯანდაცვის ყოფილი მინისტრი ეკა ტიკარაძე როცა იყო მოსული, პარლამენტში კითხვა დავსვი, მაგრამ თუ იმას გულისხმობენ, რომ ტრიბუნაზე არ ავსულვარ – ნამდვილად არ ავსულვარ.“ – განაცხადა ზაალ მიქელაძემ „აიპრესთან“.
კომენტარები