თუ ატყობთ, „ქართული ოცნების“ თავმჯდომარედ ირაკლი კობახიძის გახდომის შემდეგ, მმართველი გუნდი ლამის ყოველ კვირას პოლიტსაბჭოსა და უმრავლესობის სხდომას მართავს. ადრეც ვთქვით და ახლაც გავიმეორებთ – ეს იმისთვის ხდება, რომ კობახიძის სერიოზულად აღქმა მმართველ გუნდში ყველას უჭირს და რაც მთავარია, ისინი მას უბრალოდ არ ემორჩილებიან. ამიტომ, ყოველი პოლიტსაბჭოს შემდეგ მიბმული უმრავლესობის სხდომა ერთადერთ რამეს ემსახურება – დეპუტატებს მაგიდაზე მუშტი უნდა უბრახუნონ და აუხსნან, რომ თვითშემოქმედებასა და დამოუკიდებელ მოქმედებას შეეშვან. პარალელურად, შაბათს გამართულ უმრავლესობის სხდომაზე ისიც ითქვა, რომ დეპუტატებმა მაქსიმუმ 15 აპრილამდე უნდა წარმოადგინონ იმ ადამიანების სიები, რომლებსაც ადგილობრივი თვითმმართველობის არჩევნებზე, საკრებულოს თავმჯდომარეებად ან მერებად განიხილავენ. პარალელურად, ასეთი სიები უნდა მიიტნოს ადგილებზე პარტ-აქტივმა, სიამ უნდა გაიაროს უსაფრთხოების სამსახურის კონტროლი და გადაწყვეტილებაც ამის შემდეგ იქნება მიღებული. დეპუტატები ითხოვენ, რომ მათ მიერ დასახელებული კანდიდატები, უპირობოდ დამტკიცდნენ, რასაც პოლიტ-საბჭო არ ეთანხმება. პოლიტ-საბჭოში ყველაზე კარგად იციან, რომ კანდიდატები საბოლოოდ „პოლიტიკიდან წასულ“ ბიძინა ივანიშვილთან უნდა შეათანხმონ.
„კანდიდატთა სიასა და რეკომენდატორებს ივანიშვილს მაგიდაზე აუცილებლად დაუდებენ და ის წითელ წერტილებს დასვამს იმ გვარების გვერდით, ვისი განხილვაც დღის წესრიგიდან მოიხსნება. ამ შემთხვევაში მთავარი არა კანდიდატი, არამედ რეკომენდატორი იქნება. ივანიშვილი კიდევ ერთხელ აღარ შეცდება და მხოლოდ ერთ ადამიანზე არ ჩამოკიდებს ყველა კანდიდატს, ანუ ის გადაანაწილებს რეკომენდატორებს და ყველას გარკვეულ კვოტას მისცემს – კობახიძეს, კალაძეს, ღარიბაშვილს, ლილუაშვილს“, – გვეუბნება „ოცნების“ მაღალჩინოსანი.
ანი დვალიშვილი, „ალია“
კომენტარები