ივანიშვილმა მოახერხა და მეც გამკრა კბილი – გია ხუხაშვილი

პოლიტოლოგი, გია ხუხაშვილი, “პალიტრანიუსთან” ამბობს:

უკვე განვიხილეთ ბიძინა ივანიშვილის წერილი, რომლითაც გვითხრა, რომ გადის პოლიტიკიდან, ეს ნამდვილად ეპოქალური მოვლენაა. ბევრი ეჭვებია, რომ ჩრდილში გადადის და ინარჩუნებს ძალაუფლებას. მე ვფიქრობ, რომ იმ ფორმით, ეს ვეღარ მოხდება, მაქსიმუმ რაზეც შეიძლება ქონდეს პრეტენზია დღეის შემდეგ, ეს არის ხელისუფლების კონტროლი, იმდენად, რამდენადაც ხელისუფლების კონტროლს ხედავს ერთადერთ მექანიზმად, საკუთარი კეთილდღეობის და უსაფრთოების დაცვით. არა უმეტეს ამის. ყოველ შემთხვევაში რაღაც პერიოდი ასე იქნება.

ინტერვიუც მიუცია, იგივე საკითხებზე უსაუბრია, მე არ მიყურებია ამ ინტერვიუსთვის, არა მაქვს იმის ნერვები, გადავიმეორო ბევრჯერ და დავიზეპირო ერთიდაიგივე საუბრები. ამ ინტერვიუში, მოუხერხებია და ჩემთვისაც გაუკრავს კბილი, გვარი არ უხსენებია, მაგრამ კოლმეურნეობის თავმჯდომარეობასავით გამოსულა, როგორ ვაძლევდი მცდარ რჩევებს და ბორჯომი უხსენებია… ბორჯომში მარტო გავლით ვარ ნამყოფი… მით უმეტეს აქციები არც იყო ჩემი კომპეტენცია და არასოდეს ჩამიტარებია არსად, არც მიმიღია მონაწილეობა, მე კაბინეტურ შრომას ვარ მიჩვეული.

დამიშვია შეცდომები? – რა თქმა უნდა, დამიშვია, ბოდიშის მოხდაც შემიძლია, მისგან განსხვავებით. არასწორი პროგნოზებიც გამიკეთებია, არასწორი შეთავაზებებიც, მაგრამ მერე კორექტირება მომიხდენია. შეიძლება ისეთი რამეც გამიკეთებია, რისი მონანიებაც დამჭირვებია და მომინანიებია მერე… მასაც მინდა ვურჩიო, ნაცვლად იმისა, რომ იყოს იმ ილუზიის ტყვეობაში, რომ თავისი ინტერპრეტირებული ისტორია მოახვიოს საზოგადოებას თავს და ჩვენ ამას ვუყურებთ ბოლო დღეებია, როცა ის საუბრობს წარმატებაზე და მის უნიკალურ როლზე ამ წარმატებაში… უნიკალური როლი მას ჰქონდა, მაგრამ ყველაფერი წარმატებული ნამდვილად არ იყო, დღევანდელი სიტუაციიდან გამომდინარე. ამის ნაცვლად, თუ მას რეალურად უნდა სულიერი სიმშვიდის მოპოვება და ეს ისევ თამაში არ არის – ეს შესაძლებელია მხოლოდ და მხოლოდ მონანიებით. მონანიება დააწყნარებს მას და მისცემს საშუალებას, რომ მართლა გაერიდოს ამ აქტიურ პოლიტიკურ ცხოვრებას. თუ ის ჯიუტად იძახებს რომ ყელაფერი კარგად არის და ეს ყველაფერი მისი ხელიდან მოხდა, მას ისტორია კიდევ ერთ ჩიხში ჩაითრევს და ამ მძევლის როლიდან ვერასოდეს გამოვა და ვერც სიმშვიდეს მოიპოვებს.

მან ხაზი გაუსვა ასაკს და მეც ვისაუბრე გუშინ ასაკზე, არც მე ვარ პატარა ბიჭი, რომ აქტიურ პოლიტიკაში ვიყო და ამ ასაკში სულიერი სიმშვიდის მოიპოვება მხოლოდ მონანიებითაა შესაძლებელი.

ბატონო ბიძინა მოვინანიოთ ორივემ და მონანიებაზე გადის ჩვენი სულიერი სიმშვიდის გზა. ეს იქნება ჩემი მეგობრული რჩევა, ნამდვილად არ გეუბნებით ამას ნიშნისმოგებით. მე თქვენი გულშემატკივარ ვიყავი ყოველთვის და ახლაც ვრჩები ასეთად.”