„მინდა საჯარო მადლობა ვუთხრა ჩვენს ექიმებს, განსაკუთრებით თენგიზ ცერცვაძეს, ჩემს მეგობარს, ძალიან დიდ პატივს ვცემ საუკეთესო ექიმს და ადამიანს, ვინც მე მინახავს“,- აცხადებს ბიძინა ივანიშვილი საქართველოს პირველი არხის ეთერში.
„პანდემია თავისთავად, გამოწვევაა მთელი მსოფლიოსთვის, ქვეყანა კრიზისულ სიტუაციაშია. თქვენ ნახეთ, ახალი ვალები ავიღეთ და სიტუაცია არ არის მარტივი. ამ კრიზისულ სიტუაციაში, მაინც შესაფასებელია „ქართული ოცნების“ გუნდი. გახსოვთ, პირველი ეტაპი, როდესაც სახელისუფლო ბერკეტებით დაიწყო მომართვა და ბრძოლა ვირუსის წინააღმდეგ, ლოკდაუნს ეძახიან – ყველა სახელმწიფომ ეს გამოიყენა, მათ რიცხვში გამოვიყენეთ ჩვენც. თუ გახსოვთ, ყველაზე წარმატებული ქვეყნების რიგში ვიყავით. საუკეთესო თუ არა, ევროპაში ერთ-ერთი საუკეთესო ვიყავით. იმის შემდგომ გახსოვთ, ილუზიაც და გამონათქვამებიც – ოპონენტები წამოვიდნენ, რომ ჩვენ, ქართველებს ისეთი იმუნიტეტი გვაქვს, ეს არ გვემართება, არ დაგვემართება და ხელისუფლება არაფერ შუაში არაა.
ევროპამაც ეს გამკაცრებები მოხსნა და ამ ფონზე, ჩვენ აღარ შეგვეძლო, გაგვეგრძელებინა ამ ფორმით მართვა და პროცესი მივუშვით. ოპოზიციამაც ივაჟკაცა, ძალიან წაეხმარა ამ პროცესის გართულებას, შეკრებები, რომელიც არ უნდა გაეკეთებინა, გააკეთა. შედეგმაც არ დააყოვნა.
ქართველები ასეთი ვართ, როგორიც ვართ, მეც ტიპური ქართველი ვარ. დაუდევრები ვართ, ძალიან გვიან ვგებულობთ ინსტრუქციას და როდესაც გავუშვით, ბუნებრივად მოვიქეცით, ერთი პერიოდი ასი ათას მოსახლეზე ჩვენ ყველას გადავასწარით და ასი ათას სულ მოსახლეზე ჩვენ გავედით პირველ ადგილზე.
პირველად პირდაპირი მნიშვნელობით მომართა ხელისუფლებამ და ლამის პირველები ვიყავით, მეორედ – როდესაც აბსოლუტურად მიშვებული იყო და საზოგადოებამაც ვაჩვენეთ ჩვენი დაუდევრობა, ისევ პაციენტების რაოდენობით ასი ათას სულ მოსახლეზე პირველ ადგილზე, არც ერთ ყველაზე განვითარებულ ქვეყნებზე ნაკლებად არ ყოფილა მენეჯმენტი და მიხედვა დაავადებული პაციენტების. აი, ეს არის ჯანდაცვისა და მისი მინისტრის ნაწილი“
ბიძინა ივანიშვილმა, ალბათ, თავადაც კარგად იცის, მაგრამ “ალია” მაინც შეახსენებს მას – ექიმი, რომელსაც განსაკუთრებული მადლობა გადაუხადა, წლებია ითხოვს შენობას, კლინიკაში, რომელსაც ეს საუკეთესო ექიმი უძღვება, წყალი ჩადის, სახურავიც არ უვარგა, ამ ექიმს ჯანდაცვის მინისტრმა, ტიკარაძემ, ჯერ რემონტის ფული არ გამოუყო და მერე სასამართლოში უჩივლა – რემონტი არ გაუკეთებიაო… ამ ექიმს გიორგი გახარიამ კლინიკისთვის შენობა დაპირდა, მაგრამ არ ჩანს დაპირებული შენობა. კი, დიდი ქველმოქმედი ხართ, ბატონო ბიძინა, როგორც ამბობთ, კი, კარგი გუნდი გყავთ, როგორც გვიყვებით, კი იცით, ვინ არის საუკეთესო ექიმი, მაგრამ ამ ექიმის კლინიკაში წყალი ჩადის და გამკითხავი არავინაა წლებია, მოსვენება არა აქვს თენგიზ ცერცვაძეს კლინიკის შენობაზე ფიქრით, წლებია… განა ერთი და ორი წელია, ათეული წელია უკვე!
ესეც გეცოდინებათ, თქვენ რა გამოგეპარებათ, მაგრამ მაინც გაგახსენებთ, თენგიზ ცერცვაძემ ერთ პერიოდი უარი თქვა პაციენტების მიღებაზე კლინიკაში, რადგან არ ჰქონდა სხვა გზა – ჯანდაცვის მინისტრი უჩიოდა სასამართლოში ინფრასტრუქტურის გამო და როგორ მოეწესრიგებია შენობა? ხოდა, მაგ პერიოდში, თქვენი მეგობარი თენგიზ ცერცვაძე ლანძღეს, დახმარების მაგიერ, თქვენი გუნდის წევრებმა და მოგვიანებით კი 300 ათასი ლარი მიუგდეს, რითიც მხოლოდ დამიწების და ვენტილაციის პრობლემის მოგვარება შესძლო. პარალელურად კი, იუსტიციის მინისტრმა ნაცრისფერ საყვავილეებსა და “უფროსების სკამებში” მილიონზე მეტი დახარჯა პანდემიის დროს!
დასავლეთ საქართველოში გამონათქვამია ასეთი, ბატონო ბიძინა, “კბილებში ოფლი გამოუვიდაო” და მაშინ ამბობენ, როცა ვიღაცას ძალიან შერცხვა, კი გეცოდინებათ ეგ გამოთქმა ჩვენზე უკეთ და მხოლოდ თქვენ კი არა, “ოცნების” მთელ გუნდს უნდა გამოსდიოდეს ოფლი კბილებში თენგიზ ცერცვაძის სახელის ხსენებისას!
კომენტარები