კორონავირუსის საკითხებზე ისრაელის მთავრობის კოორდინატორმა, სალმან ზარკამ განაცხადა, რომ ისრაელმა კორონავირუსის ვაქცინის მეოთხე დოზით აცრის შესაძლო კამპანიისთვის მზადება უნდა დაიწყოს.
„იმის გათვალისწინებით, რომ ვირუსი აქ არის და აქ რჩება, ჩვენ ასევე უნდა მოვემზადოთ მეოთხე დოზისთვის. ამიერიდან ეს ჩვენი ცხოვრებაა, რომელიც ტალღებით განისაზღვრება“, – აღნიშნა კორონავირუსის საკითხებზე ისრაელის მთავრობის კოორდინატორმა.
30 აგვისტოს ისრაელმა 12 წლის ზემოთ პირების კორონავირუსის საწინააღმდეგო ვაქცინის მესამე დოზით აცრა დაუშვა.
ისრაელის ჯანდაცვის უწყებაში აღნიშნავენ, რომ ვაქცინის პირველი ორი დოზის ეფექტი ხუთი თვის შემდეგ სუსტდება და ადამიანებმა, რომლებიც 5 თვის წინ აიცრნენ, დამატებითი მესამე დოზა უნდა მიიღონ.
ისრაელში, 1-ლი აგვისტოდან 60 წელს ზემოთ პირების Pfizer-ის ვაქცინის მესამე დოზით აცრა დაიწყო. ვაქცინის მესამე დოზის შეყვანა მიზნად კორონავირუსის ახალი შტამების წინააღმდეგ იმუნიტეტის გაძლიერებას ისახავს. ისრაელში 1.9 მილიონმა ადამიანმა უკვე მიიღო ვაქცინის მესამე დოზა.
ისრაელის ანდაცვის სამინისტროს მონაცემების თანახმად, გამაძლიერებელი დოზის მიღებიდან 16 დღის შემდეგ, კორონავირუსის საწინააღმდეგო ვაქცინის მესამე დოზა ვირუსით გამოწვეული მძიმე დაავადებებისგან დაცვას 97%-მდე ზრდის.
გარდა ამისა, გამაძლიერებელი დოზის მიღებიდან 16 დღის შემდეგ, ინფექციისგან დაცვა 95%-მდე იზრდება.
მონაცემები ასევე ცხადყოფს, რომ ანტისხეულების დონე საგრძნობლად მაღალია მესამე დოზის მიღებიდან შვიდი დღის განმავლობაში, თუმცა, როგორც ჩანს, პიკს 16 დღის შემდეგ აღწევს.
კომენტარები