ისრაელ-ჰამასის ომის დაწყებიდან 1 წელი გავიდა – 2023 წლის 7 ოქტომბერს, ჰამასის მებრძოლებმა ისრაელის სამხრეთში სასაზღვრო ბარიერების გადალახვა შეძლეს და ებრაულ დასახლებებში შეაღწიეს, პარალელურად კი, ისრაელის მიმართულებით, 5 000-ზე მეტი რაკეტა გაუშვეს.
მაშინ პალესტინელმა ტერორისტებმა ასობით მშვიდობიანი მოქალაქე მოკლეს, 200-მდე კი მძევლად აიყვანეს.
ისინი განსაკუთრებული სისასტიკით გაუსწორდნენ რეიმთან ახლოს გამართულ მუსიკალურ ფესტივალზე მყოფ ადამიანებს, სადაც, სულ მცირე 260 ისრაელელი და უცხოელი დაიღუპა, ბევრი კი უგზო-უკვლოდ დაიკარგა.
ამის შემდეგ, ისრაელმა უსაფრთხოების ძალები მოაბილიზა და ანტიტერორისტული ოპერაცია დაიწყო, რის შედეგადაც, თავდაცვის ძალების ცნობით, ჰამასის 1500-მდე ტერორისტი დაიღუპა. დაიწყო ღაზას სექტორის საარტილერიო და საავიაციო დაბომბვაც. ისრაელის ხელისუფლებამ განაცხადა, რომ მათი საბოლოო მიზანი ჰამასის საბოლოო განადგურება იყო.
მოგვიანებით, ჰამასს “სოლიდარობა” გამოუცხადა ლიბანურმა, შიიტურმა ტერორისტულმა დაჯგუფებამ – ჰეზბოლამ.
ისრაელსა და ჰამასს შორის საომარი მოქმედებები დღემდე გრძელდება.
2024 წლის 31 ივლისს ჰამასმა გამოაცხადა, რომ ისრაელმა მათი პოლიტიკური ლიდერი, ისმაილ ჰანიე თეირანში მოკლა. ირანის სულიერმა ლიდერმა, აიათოლა ალი ხამენეიმ განაცხადა, რომ ირანი თავის მოვალეობად მიიჩნევს შური იძიოს “ჰამასის” პოლიტიკური ლიდერის ისმაილ ჰანიეს მკვლელობის გამო, რადგან ის ირანის მიწაზე მოკლეს.
“თქვენ მოკალით ჩვენი ძვირფასი სტუმარი ჩვენს სახლში და ახლა გზა გაუხსენით მკაცრ სასჯელს”, – თქვა მან, რა დროსაც მხედველობაში ისრაელი ჰქონდა. ირანის ახალმა პრეზიდენტმა პატივი მიაგო ისმაილ ჰანიეს ხსოვნას და მას “პალესტინის წინააღმდეგობის მამაცი ლიდერი” უწოდა.
ისმაილ ჰანიეს მკვლელობის საპასუხოდ, ირანმა ისრაელზე დარტყმის ბრძანება გასცა
28 სექტემბერს კი ისრაელმა გამოაცხადა, რომ ლიკვიდირებული იყო “ჰეზბოლას” მეთაური, ჰასან ნასრალა.
ამის შემდეგ, “ჰეზბოლამ” ორგანიზაციის ახალ გენერალურ მდივნად მისი ბიძაშვილი, ჰაშემ საფი ად-დინი აირჩია.
6 ოქტომბერს, ისრაელის პრემიერმინისტრმა, ბენიამინ ნეთანიაჰუმ ვიდეომიმართვაში განაცხადა, რომ ქვეყანა 7 ფრონტზე იბრძვის და ყველა მათგანის უკან ირანი დგას.
“დღეს ისრაელი ცივილიზაციის მტრებისგან 7 ფრონტზე იცავს თავს, მათ შორისაა ირანის მიერ მხარდაჭერილი “ჰეზბოლა” ჩრდილოეთში, “ჰამასი” ღაზაში, “ჰუსიტები” იემენში, ტერორისტები დასავლეთ სანაპიროზე და შიიტური დაჯგუფება ერაყსა და სირიაში. რაც მთავარია, ჩვენ ვიბრძვით ირანის წინააღმდეგ, რომელმაც გასულ კვირას 200-ზე მეტი ბალისტიკური რაკეტა გაუშვა პირდაპირ ისრაელისკენ და რომელიც დგას ისრაელის წინააღმდეგ არსებული ყველა ომის უკან. ყველაფრის მიუხედავად, დარწმუნებული იყავით, ისრაელი იბრძოლებს მანამ სანამ არ გაიმარჯვებს,” – განაცხადა ნეთანიაჰუმ.
ისრაელის თავდაცვის ძალების პრესსპიკერის, დანიელ ჰაგარის თქმით, “ჰამასის” ისრაელზე თავდასხმიდან ერთი წლის შემდეგ ისრაელი შესაძლო ტერორისტული აქტების გამო მზადყოფნაშია.
“ისრაელის თავდაცვის ძალები სრულ მზადყოფნაში არიან 7 ოქტომბრისთვის, რაც უკავშირდება “ჰამასის” მიერ ისრაელზე თავდასხმის ერთი წლისთავს. ჩვენ მზად ვართ ჩვენი გაძლიერებული ჯარით იქიდან გამომდინარე, რომ სავარაუდოდ ამ თარიღისთვის განხორციელდება ტერორისტული თავდასხმების მცდელობა,” – ამბობს ჰაგარი.
ფოტო: რადიო თავისუფლება – 2023 წლის 7 ოქტომბერი – პალესტინელები არღვევენ საზღვარს და იჭრებიან ისრაელში.
კომენტარები