„ის ადამიანები, რომლებიც ერთ დაძახებაზე გროვდებოდნენ, უბრალოდ, გაქრნენ“

ანი დვალიშვილი

ქართული პოლიტიკის შიდა სამზარეულოში სიტუაცია ცოტა არ იყოს, სასაცილოა, რადგან ოპოზიციური პარტიები ერთიანდებიან, პარლამენტში ოპოზიციის წევრები პარტიიდან გადიან, დამოუკიდებლად მოქმედებენ, სხვებს უერთდებიან. ვერ გაიგებ, ვისი ფრაქცია ვის პარტიაშია და ყველაფერი ძალიან, ძალიან დაემსგავსა აბსურდის თეატრს. „ქართული ოცნება“ აკეთებს და ასრულებს ყველაფერს, რაც უნდა და როგორც უნდა, არ აინტერესებს ევროპელებისა და ამერიკის შენიშვნები და მეტიც, რეკომენდაციებზე საუბარი კი მიდის, მაგრამ პირდაპირ მინიშნებასაც ვხედავთ, რომ კანდიდატის სტატუსის არმიღება მმართველ გუნდს დიდად არ დაამწუხრებს.

„როგორც ადრე აღვნიშნე, „ოცნება“ უკვე ემზადება 2024 წლის საპარლამენტო არჩევნებისთვის. სწორედ ამის მანიშნებელი იყო ის, რომ პარტიის ლიდერებმა ოფიციალურად გამოაცხადეს შეხვედრების დაწყების შესახებ და გუნდი ყველა რეგიონს მოივლის, ზაფხულიდან კი, ოფისები გაიხსნება ყველგან და ეს არ იქნება მხოლოდ ოფისების რიგითი გახსნა – იქ იმუშავებენ ადამიანები, ამაში აიღებენ ხელფასს და ერთი წლით ადრე, გუნდი სრული სვლით მზად იქნება არჩევნების მოსაგებად. და რას შვრება ამ დროს ოპოზიცია? არაფერს და ვერაფერს, რადგან ოპოზიციას არ აქვს არც ფინანსური რესურსი და რეალურად, აღარ ჰყავს მუდმივმოქმედი ელექტორატი. ანუ, ის ადამიანები, რომლებიც ერთ დაძახებაზე გროვდებოდნენ, უბრალოდ, გაქრნენ – ნაწილი ემიგრაციაში წავიდა, ნაწილი კი „ოცნებამ“ გადაიბირა და დაასაქმა“, – გვეუბნება მმართველი გუნდის ერთ-ერთი ლიდერი.

და ერთი, არც თუ უინტერესო დეტალი – თუ ატყობთ, რომ ქართული პოლიტიკა იმდენად არაფრისმომცემი და უინტერესო გახდა, რომ ტელევიზიები ყველაფერს აკეთებენ, მეორე ხარისხის რანგის პოლიტიკოსებს მაინც, მუშტი-კრივი გაამართინოს და მაყურებელი ასე მაინც მიიზიდოს. პოლიტიკოსები საინტერესოს უბრალოდ ვეღარაფერს ამბობენ და აკეთებენ და იმით იწონებენ თავს, ვინ რამდენი სურათი გადაიღო ბრიუსელში პრემიერების თუ ევროპარლამენტარების გვერდით. სასაცილოც აღარ არის ეს – პაოლო მალდინის გვერდით მაქვს სურათი გადაღებული და ეს არ ნიშნავს, რომ ფეხბურთში იმის მეასედი მაინც ვიცი, ვიდრე ლეგენდარულმა იტალიელმა. ჰოდა, პოლიტიკაშიც ასეა რა…