საქართველოს პრემიერ-მინისტრი ირაკლი ღარიბაშვილი გამოეხმაურა ვიცე-პრემიერის, საგარეო საქმეთა მინისტრ დავით ზალკალიანის ვიზიტს აღმოსავლეთ პარტნიორობის მინისტერიალზე ბრიუსელში, რომელიც, პრემიერის შეფასებით, წარმატებით ჩატარდა.
„ჩვენ ახლა ვემზადებით ასოცირებული ტრიოს – საქართველო, უკრაინა, მოლდოვის პრემიერების შეხვედრისთვის, რომელიც, სავარაუდოდ, 30 ნოემბერს და პირველ დეკემბერს ბრიუსელში გაიმართება. ჩვენ უკვე გვაქვს წინასწარი თანხმობა და დადასტურება ამის თაობაზე. ეს იქნება მოსამზადებელი ვიზიტი აღმოსავლეთ პარტნიორობის სამიტისთვის, რომელიც უკვე 15 დეკემბერს ბრიუსელში გაიმართება და რომელშიც მე მივიღებ მონაწილეობას,“ – განაცხადა პრემიერ-მინისტრმა.
ცნობისთვის, მინისტერიალი „აღმოსავლეთ პარტნიორობის“ სამიტამდე ერთი თვით ადრე იმართება და მიზნად ისახავს დისკუსიის წარმოებას სამიტის მთავარი თემების ირგვლივ.
მინისტერიალის პარალელურად, დავით ზალკალიანმა შეხვედრები გამართა ევროკავშირის სამეზობლოსა და გაფართოების კომისარ ოლივერ ვარჰეისთან, სადაც საქართველოსა და ევროკავშირს შორის არსებული ურთიერთობების უფრო ფართო სპექტრი განიხილეს.
კომენტარები