ინფორმაცია მათთვის ვისაც აშშ-ს ვიზის მიღება სურს

2026 წლიდან აშშ H-1B-ის ვიზების ლატარიის წესებს ცვლის.

ინფორმაციას Associated Press ავრცელებს.

აშშ-ის მოქალაქეობისა და იმიგრაციის სამსახური ამ გადაწყვეტილების მიზეზად იმას ასახელებს, რომ „H-1B-ის ვიზებზე განაცხადების შემთხვევითი შერჩევის ამჟამინდელ მექანიზმს აშშ-ის დამსაქმებლები ბოროტად იყენებენ და, ძირითადად, უფრო დაბალ ხელფასზე მომუშავე უცხოელი მუშაკების მიზიდვას ცდილობენ, ვიდრე აშშ-ის მოქალაქეებს გადაუხდიდნენ.“

ტრადიციულად H-1B-ის ვიზები ლატარიის საშუალებით გაიცემა. აშშ ყოველწლიურად 65 000-მდე ახალ H-1B-ის ვიზას და დამატებით 20 000 ვიზას მაგისტრის ხარისხის ან უმაღლესი განათლების მქონე აპლიკანტებისთვის გასცემს.

უწყების ცნობით, ახალი სისტემა „შეწონილი შერჩევის მექანიზმს შემოიღებს, რაც იმის ალბათობას გაზრდის, რომ H-1B-ის ვიზებს უფრო კვალიფიციური და მაღალანაზღაურებადი უცხოელი სპეციალისტები მიიღებენ.“ ის 2026 წლის 27 თებერვალს შევა ძალაში და რეგისტრაციის უახლოეს სეზონზე წლიური H-1B-ის კვოტის ფარგლებში იქნება გამოყენებული.

2025 წელს H-1B-ის ვიზების ყველაზე დიდი მიმღები კომპანია, Amazon იყო, რომელსაც 10 000-ზე მეტი ნებართვა დაუმტკიცდა. მას მოსდევს კომპანიები, Tata Consultancy Services, Microsoft, Apple და Google. H-1B-ის ვიზების მქონე მუშახელის ყველაზე დიდი კონცენტრაცია კალიფორნიის შტატში ფიქსირდება.

ცნობისთვის: 18 დეკემბერს აშშ-ის პრეზიდენტ დონალდ ტრამპმა „მწვანე ბარათის“ ლატარიის (Diversity Visa Program) შეჩერების ბრძანება გამოსცა. ასევე, სექტემბერში მან კვალიფიციური უცხოელი მუშახელის H-1B-ის ვიზების განსახილველად 100 000 დოლარის ოდენობის საფასურის, ხოლო მდიდრებისთვის 1 მლნ დოლარის სანაცვლოდ „ოქროს ბარათების“ შემოღება გამოაცხადა.