ინდოეთში, კერალას შტატში, ნიპა ვირუსი უკვე 11 ადამიანს დაუდგინდა. ადგილობრივი ჯანდაცვის უწყებების ინფორმაციით, პაციენტების მდგომარეობა ამჟამად სტაბილურია.
გარდა ინფიცირებულებისა, დაკვირვების ქვეშ სულ 38 ადამიანი იმყოფება, რომლებიც შესაძლოა ინფიცირებულები იყვნენ.
კერალას შტატში ნიპა ვირუსს 12 წლის ბიჭი ემსხვერპლა. ამ ტრაგიკული ინციდენტის შემდეგ, ექიმებმა ნიპა ვირუსზე საზოგადოების მასობრივი შემოწმება დაიწყეს.
გაიზარდა უსაფრთხოების ზომები კოჟიკოდის რაიონში, სადაც ბიჭი გარდაიცვალა და ასევე, სამ მეზობელ რაიონში.
ნიპა ვირუსმა ადამიანებში შეიძლება გამოიწვიოს სერიოზული დაავადება, რომელსაც ახასიათებს ენცეფალიტი. ამასთან ნიპა ვირუსი იწვევს რესპირატორულ დაავადებებსაც.
ამ დროისათვის ნიპა ვირუსის ვაქცინა და წამალი არ არსებობს. სიკვდილიანობა ინფიცირების შემთხვევაში 40-დან 75 პროცენტამდე მერყეობს.
ჯანდაცვის მსოფლიო ორგანიზაციის (WHO) მიერ ნიპას ვირუსი კლასიფიცირებულია, როგორც ერთ-ერთი ყველაზე საშიში მომაკვდინებელი ინფექცია. ის ადამიანებზე გადადის ცხოველებისგან, ასევე ინფიცირებულ პირთან კონტაქტისას.
კომენტარები