კომპანია SpaceX-ის დამფუძნებელი ილონ მასკი უკრაინის შეიარაღებულ ძალებს Starlink-ის გამოყენების პირობების დარღვევაში ადანაშაულებს. მისი განცხადებით, უკრაინელმა სამხედროებმა სატელიტური ინტერნეტის სისტემა შეტევითი დრონებით ოპერაციებისთვის გამოიყენეს, რაც მომსახურების წესებით აკრძალულია.
მასკმა სოციალურ ქსელ X-ში დაწერა, რომ გასულ კვირას კომპანიამ სისტემის ამგვარი გამოყენების შესაძლებლობა შეზღუდა.
„Starlink-ის, როგორც სამოქალაქო კომერციული სერვისის, გამოყენება შეტევითი დრონებით ადამიანების დასახოცად არასოდეს ყოფილა ნებადართული და არც უნდა იყოს. უკრაინის სამხედროებმა დაარღვიეს Starlink-ის გამოყენების პირობები. ეს ხარვეზი გასულ კვირას აღმოიფხვრა“, – განაცხადა მასკმა.
მისი თქმით, Starlink კვლავ გადამწყვეტ როლს ასრულებს უკრაინის თავდაცვაში და სისტემის სრულად გათიშვა ფრონტზე მძიმე შედეგებს გამოიწვევდა.
მასკმა გააკრიტიკა ის პოლიტიკოსებიც, რომლებიც, მისი შეფასებით, ომის გაგრძელებას უჭერენ მხარს.
„უდიდეს ზიზღს ვგრძნობ იმ ბოროტი ომის გამჩაღებლების მიმართ, რომლებიც დაუსრულებელ ხოცვა-ჟლეტას ემხრობიან და კონფლიქტის მოგვარების არანაირ რეალისტურ გზას არ გვთავაზობენ. ჯოჯოხეთში დაიწვებით“, – დაწერა მან.
ამასთან, უკრაინული მხარე მასკის ბრალდებას არ ეთანხმება. უკრაინის პრეზიდენტის მრჩევლის, სერგი ბესკრესტნოვის განცხადებით, უკრაინას Starlink-ის გამოყენება საშუალო და შორი მოქმედების შეტევითი დრონებისთვის ტექნიკურად არ შეუძლია.
24 ოქტომბერს უკრაინის პრეზიდენტმა ვოლოდიმირ ზელენსკიმ განაცხადა, რომ Starlink-ისა და Starshield-ის მუშაობის სიჩქარე, ერთ კვირაზე მეტი ხნის შეზღუდვების შემდეგ, აღდგენილია.
კომენტარები