ისრაელში, ალ-აქსას მეჩეთთან, პალეტინელებსა და სამართალდამცველებს შორის მომხდარი დაპირისპირების დროს დაშავებულთა რაოდენობა უკვე 200-ს აჭარბებს. მათ შორის, 205 პალესტინელი და ისრაელის პოლიციის 17 წარმომადგენელია, – ამის შესახებ The Guardian-ი წერს.
დაპირისპირება თითქმის ერთი კვირაა გრძელდება. პალესტინელები აცხადებენ, რომ მუსლიმებისთვის წმინდა, რამადანის თვეში, ისრაელში მათმა ჩაგვრამ უფრო იმატა. სიტუაციას უფრო ართულებს ისრაელის სასამართლოს მოსალოდნელი გადაწყვეტილება იმის შესახებ, რომ შესაძლოა, პალესტინელები სახლებიდან გააძევონ და მათი ქონება ებრაელებს გადასცენ.
მედიის ინფორმაციით, ალ-აქსას მეჩეთში, სადაც ათასობით პალესტინელი შეიკრიბა, მათ ისრაელის საწინააღმდეგო ფრაზების სკანდირება დაიწყეს, რასაც მწვავე დაპირისპირება მოჰყვა.
მას შედეგ, რაც პალესტინელებმა პოლიციელებს სკამები, ფეხსაცმელი და ქვები დაუშინეს, სამართალდამცველებმა, მათ დასაშლელად, რეზინის ტყვიები და ხმოვან-მანათობელი ყუმბარები გამოიყენეს.
დაშავებულთა სამკურნალოდ საველე ჰოსპიტალის მოწყობა გახდა საჭირო.
ალ-აქსას მეჩეთის კომპლექსი ერთ-ერთი წმინდა ადგილია როგორც ისლამის, ისე, იუდაიზმის აღმსარებელთათვის.
ბოლო ერთი კვირაა, ვითარება გამწვავებულია მდინარე იორდანეს დასავლეთი ნაპირზეც.
კომენტარები