“გირჩის” ერთ-ერთმა ლიდერმა იაგო ხვიჩიამ “პალიტრანიუსის” ეთერში დევნილების პრობლემებზე ისაუბრა და განაცხადა, რომ რასაც ამ ადამიანების წინაშე ყველაზე მეტად ვაშავებთ, სინამდვილეში არის ის, რომ მათ აფხაზეთში საკუთარი ქონების რეგისტრაციის და განკარგვის უფლებას არ ვაძლევთ.
მისივე თქმით, არასასიამოვნოა, როდესაც ადამიანი 30 წელია, რაც თბილისში ცხოვრობს და დახმარებას ადგილობრივებისგან ითხოვს. როგორც ხვიჩიამ განმარტა, ასე, ისინი სულ დევნილის სტიგმის ქვეშ იქნება და სურს, რომ ეს ხალხი ამ სტიგმიდან მალე გამოვიდე.
“ამ ადამიანების წინაშე ყველაზე მეტად ვაშავებთ, სინამდვილეში არის ის, რომ საკუთარი ქონების, რომელიც აფხაზეთში აქვთ, არც რეგისტრაციის და არც განკარგვის საშუალებას არ ვაძლევთ. ადამიანებს იქ ქონებები აქვთ, მაგრამ დღეს, ჩვენ იმის აღრიცხვაც კი არ დაგვიწყია, ვისი რა არის. შეგვიძლია დავარეგისტრიროთ და გასხვისების საშუალება დავუშვათ. ჯერ ჩვენ ვაღიაროთ მათი საკუთრების უფლება იმ ქონებაზე, რუსებმა რომ წაართვეს.
უფრო ძვირი ეღირება აფხაზეთის ტერიტორიაზე მათი ქონებების რეგისტრაცია რომ დაიწყოს. ქონებას ფასი მიეცემა. ჩვენ ეს პოლიტიკურ საკითხად გვაქვს ქცეული და უბრალოდ ბლოკადაში გვყავს რუსი ოკუპანტები მოქცეული, ამის გამო ვაკეთებთ ამას – ჩვენს მოქალაქეებს ქონებას არ ვურეგისტრირებთ.
რაც შეეხება მშენებლობას, მე არ მითქვამს, ვიღაცამ რაღაცა არ ააშენოს – მეთქი, ოღონდ აქაც პრიორიტეტი უნდა იყოს ადამიანის გაჭირვება, ჩვენ გაჭირვებულებს უნდა დავეხმაროთ. სრულწლოვანი ადამიანი რომ 30 წელია თბილისში ცხოვრობს, ის რომ მე რაღაცის გამო დახმარებას მთხოვს არასამართლიანია, მართლა არასამართლიანია. 50 წლის მერე უფრო არასამართლიანი იქნება და ეს ხალხი სულ ამ სტიგმის ქვეშ იქნება – დევნილის სტიგმის ქვეშ. მე მინდა, რომ ეს ხალხი გამოვიდეს აქედან. ეს ხალხი თბილისელები არიან, 30 წელია აქ ცხოვრობენ“, – განაცხადა იაგო ხვიჩიამ.
კომენტარები