“გირჩის” დეპუტატი იაგო ხვიჩია სოციალურ ქსელში პოსტ ბლოგს აქვეყნებს და საქართველოში პირველი პირების ე.წ. “პოლიტიკურ ლომკაზე” – მეგალომანიისკენ სწრაფვაზე საუბრობს.
“პოსტ ბლოგი – “პოლიტიკური ლომკა”.საქართველოს პირველი პირების ავადმყოფობა მეგალომანიისკენ სწრაფვაა. ჩემი აზრით, ეს ერთგვარი პროფესიული დაავადებაა და იმ პირველ პირებს ემართებათ, რომელთაც ოდესმე შეუზღუდავი ძალაუფლება გაუსინჯავთ.თავისი შინაარსით ის ნარკოდამოკიდებულებას ჰგავს, თუ ძალაუფლება მოგაკლდა ლომკა გეწყება და რაც უფრო გაკლდება, მით უფრო უხარისხო ნარკოტიკზე გიწევს გადასვლა.
ჩვენში ეს დაავადება ყველას დაემართა და ჯერჯერობით მხოლოდ შევარდნაძემ შეძლო მისგან განკურნება. საბოლოოდ მშრალზე გადააგდო – მიხვდა რა რომ შეიწირავდა.
(ბატონ ედუარდს გამოცდილება დაეხმარა, ბევრი ჰქონდა ნანახი და ზუსტად იცოდა, რომ სამყარო საქართველოს პირველი პირის გარშემო ვერ იტრიალებდა, ვინც არ უნდა ყოფილიყო ის).
მიუხედავად იმისა, რომ ზოგადად დამოკიდებულება ძალიან დიდი პრობლემაა, ნარკომანის თვალით ნანახი პრობლემა მხოლოდ მაშინ იწყება, როცა დეფიციტია.
ბოლოს კი ეს ამბავი იქამდე მიდის, რომ დამოკიდებულის ოჯახი (ან თანაგუნდელები) შეიძლება მშივრებიც კი დარჩნენ.ჯერ დანამდვილებით მაინც არ ვიცით მმართველი პარტიის ლიდერის ე.წ წასვლა ამ სენთან გამკლავების მცდელობაა თუ უბრალოდ დოზის მიღების არასაჯარო სივრცეში გადატანა, მაგრამ დანამდვილებით ვხედავთ, რომ მთავარი ოპოზიციური პარტიის ლიდერს ეს სენი სერიოზულობას აკარგვინებს. სერიოზულობა კი საქმეში აუცილებელია, მით უფრო, როცა ციხიდან გიწევს მისი კეთება”. – წერს იაგო ხვიჩია.
კომენტარები