გუშინ მკაფიოდ გამოჩნდა, რომ ევროკავშირი და „ქართული ოცნება“ შეუთავსებელია – ამის შესახებ „კოალიცია ცვლილებისთვის“ ერთ-ერთმა ლიდერმა, ელენე ხოშტარიამ დღეს გამართულ ბრიფინგზე განაცხადა.
მისი თქმით, სწორედ საერთო ბრძოლის, რუსთაველზე დგომის, გაუტეხლობის შედეგია ის, რაც კაია კალასისგან მოვისმინეთ.
ხოშტარიას თქმით, ევროპამ „ქართულ ოცნებას“ კონკრეტული 8 მოთხოვნით მიმართა იმისთვის, რომ ურთიერთობების გაგრძელება შესაძლებელი იყოს.
პოლიტიკოსის განცხადებით, „ქართული ოცნების“ პირობებში ქვეყანა კარგავს არამხოლოდ ევროპის პერსპექტივას, არამედ იმ მონაპოვარსაც, რომელიც ათწლეულების ბრძოლით არის მოპოვებული და რომელიც საქართველოს ყველა მოქალაქისთვის ძალიან მნიშვნელოვანია“.
„ეს არის გზავნილი, რომ ამ ბრძოლაში მარტო არ ვართ და მსოფლიოში წამყვანი ქვეყნების საგარეო საქმეთა მინისტრები იმავე მოთხოვნებს უყენებენ „ქართულ ოცნებას“. ამასთანავე, გუშინ მკაფიოდ გამოჩნდა, რომ ევროკავშირი და „ქართული ოცნება“ შეუთავსებელია – ეს ორი ერთად შეუძლებელია. „ქართული ოცნების“ პირობებში ვკარგავთ არამხოლოდ ევროპის პერსპექტივას, არამედ იმ მონაპოვარსაც, რომელიც ათწლეულების ბრძოლით არის მოპოვებული და რომელიც საქართველოს ყველა მოქალაქისთვის ძალიან მნიშვნელოვანია. ეს არის უვიზო მიმოსვლა და ის სიკეთეები, რაც მიუხედავად პოლიტიკური პოზიციისა, ყველასთვის ძალიან მნიშვნელოვანია. ამ მონაპოვარის დაცვისთვის, იმისთვის, რომ საქართველო ევროპულ გზაზე დაბრუნდეს, იმისთვის, რომ სამართლიანობა დაბრუნდეს საქართველოში და იმისთვის, რომ ჩვენ წარმატებული ევროპული სახელმწიფო ვიყოთ, უნდა ვებრძოლოთ „ქართულ ოცნებას“, რომელიც ამ მომავალთან შეუთავსებელია. ამ ბრძოლის ერთადერთი გზა არის წინააღმდეგობა, ართანამშრომლობა, რეჟიმის იზოლაცია და დემონტაჟი.
19 ივლისს, შაბათს, 19:00 საათზე ვიკრიბებით თსუ-სთან აქციაზე, რომელიც ზუსტად ამ დიდი წინააღმდეგობის ამოცანებს ემსახურება“, – განაცხადა ხოშტარიამ.
კომენტარები