სკოლები მერხების გარეშეა დარჩენილი – კომპანიამ, რომელმაც ტენდერი მოიგო, ნაკისრი ვალდებულებები ვერ შეასრულა. “ტვ პირველის” მიერ მოპოვებული ინფორმაციით, ახლა განათლების სამინისტრო დამატებით ოთხი მილიონ რვაასი ათასი ლარის გამოყოფას ითხოვს, რომ მერხები სხვა კომპანიისგან იყიდოს.
დოკუმენტებით ირკვევა, რომ ტენდერში ისეთ კომპანიას გაამარჯვებინეს, რომელიც მანამდეც შავ სიაში იყო.
სატენდერო პირობის თანახმად კომპანია “ოთმას” 115 საჯარო სკოლისთვის უნდა მიეწოდებინა მერხები, სკამები და სხვა სასკოლო ინვენტარი. ამისთვის ბიუჯეტიდან 3 000 000 ლარი გამოიყო. ვინაიდან “ოთმამ” ნაკისრი ვალდებულებები ვერ შეასრულა ახლა სახელმწიფოს მერხებისთვის დამატებით მილიონების გადახდა უწევს.
სახელმწიფომ დაკარგა დრო, დაკარგა ფინანსები, ახლა კი იძულებულია, სასკოლო ინვენტარი გამარტივებული შესყიდვის წესით შეიძინოს. რაც აჩენს ეჭვს, რომ ისეთი კომპანიისგან შეიძენენ მერხებს, რომლებიც “ქართული ოცნების” შემომწირველია ან მათთან იქნება დაკავშირებული. ამასთან, გამარტივებული შესყიდვა არ იძლევა საშუალებას პროდუქტს ფასი დააკლდეს, პირიქით, უფრო მეტ ფულს გადავიხდით ბიუჯეტიდან ვიდრე ეს წინა შემთხვევაში იყო. სახეზეა თანამდებობრივი გულგრილობა, ჩანს კორუფციული ნიშნები და სხვა”- აცხადებს კორუფციის მკვლევარი ბესიკ დონაძე.
კომენტარები