გიორგი შაქარაშვილის საქმეზე, არასრულწლოვანთა ეპიზოდზე განაჩენი 13 ნოემბერს გამოცხადდება. საქმის არსებითი განხილვა გუშინ დასრულდა და მოსამართლე სათათბიროდ გავიდა. სხდომაზე დაცვის მხარემ დასკვნითი სიტყვის წარმოთქმა დაასრულა. მხარეებმა ასევე ისარგებლეს რეპლიკით, ხოლო კანონთან კონფლიქტში მყოფმა პირებმა საბოლოო სიტყვა წარმოთქვეს.
დაცვის მხარის განმარტებით, საქმეში მტკიცებულებები არ არსებობს და გამამართლებელ განაჩენს ელოდებიან, რასაც ბრალდების მხარე ეწინააღმდეგება. პროკურორი ნანა გუგუტიშვილი ამბობს, რომ დაცვის მხარემ მოწმეთა ჩვენებები ობიექტურად არ შეაფასა.
საქართველოს გენერალურმა პროკურატურამ გიორგი შაქარაშვილის დამამძიმებელ გარემოებებში განზრახ მკვლელობის ბრალდებით სისხლის სამართლებრივი დევნა ხუთი პირის მიმართ დაიწყო. გენპროკურატურამ შაქარაშვილის საქმეზე 11 ბრალდებულის საქმე ცალკე წარმოებად გამოყო.
10 ივლისს პროკურატურამ გაავრცელა ინფორმაცია, რომლის თანახმადაც, გიორგი შაქარაშვილის სიკვდილის მიზეზია ასფიქსია წყალში დახრჩობით. ამასთან, ექსპერტიზის დასკვნით გაირკვა, რომ მას გარდაცვალებამდე მკვრივი-ბლაგვი საგნით მიყენებული დაზიანებები აქვს.
28 ივნისს გიორგი შაქარაშვილის საქმეზე ბრალდებულ 17 პირს აღკვეთის სახით პატიმრობა შეეფარდა.
19 ივნისს, დაახლოებით 11:00 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები. 4-დღიანი უწყვეტი საძიებო სამუშაოების შედეგად მყვინთავებმა ფეხბურთელ გიორგი შაქარაშვილის ცხედარი წყალში იპოვეს.
კომენტარები