გიგი უგულავა – დიდი ცვლილებების ეპოქა იწყება

ჩვენ უნდა გვესმოდეს, რომ საქართველო მომდევნო 10 წელიწადში შედის სრულიად ახალ პოლიტიკურ ცხოვრებაში. ჩვენ 30 წელიწადი როგორც ვიცხოვრეთ, პოლიტიკური ცხოვრება და შესაბამისად, საზოგადოებრივი ცხოვრება ასეთი აღარ იქნება, – ამის შესახებ „ევროპული საქართველოს“ ერთ-ერთმა ლიდერმა გიგი უგულავამ ჟურნალისტებს საარჩევნო ცვლილებებზე საუბრისას განუცხადა.

უგულავას განცხადებით, ახლა მნიშვნელოვანი ისტორიული მომენტია და იწყება ტრანსფორმაციების დიდი ეპოქა.

„იქნება მრავალპარტიული სისტემა და ჩვენი პოლიტიკური თაობის ამოცანა ზუსტად არის, რომ ამ სისტემამ იმუშაოს და ამ სისტემამ სიკეთე, გამდიდრება, კეთილდღეობა და უსაფრთხოება მოუტანოს ჩვენს მოქალაქეებს. ეს გარანტირებული არ არის, აგერ ხედავთ, მაჟორიტარები იმუქრებიან, რომ 10 წელი გავა და ისევ მაჟორიტარებს დაუბრუნდებითო, თუ იქნება ქაოსი და კორუფცია, ბუნებრივია, გაიზრდება მოთხოვნილება ისევ „ძლიერ ხელზე“. ჩვენ ძალიან ისტორიულ მომენტში ვიმყოფებით, მიუხედავად იმისა, რომ სრულად პროპორციულზე ვერ გადავედით, არსებითად, მომდევნო 3-4 წლის განმავლობაში გადავალთ პროპორციულ სისტემაზე, რაც ნიშნავს რეალურ მრავალპარტიულობას, რაც ნიშნავს დაპირისპირებულების შეთანხმებას, რაც გამორიცხავს ერთამენთში თავში აგურის ჩარტყმას, გამორიცხავს პოლიტიკურ ძალადობას პოლიტიკურ ოპონენტებზე და გამორიცხავს სასამართლოს შენი ნება-სურვილით გამოყენებას. ამიტომ, დიდი ტრანსფორმაციების ეპოქა იწყება, დიდი ცვლილებების ეპოქა იწყება“, – განაცხადა უგულავამ.

როგორც მან აღნიშნა, იმისათვის, საზოგადოებამ იცხოვროს, პირველ რიგში ეკონომიკაა მისახედი.

„ეკონომიკური თვალსაზრისით ძალიან მძიმე პრობლემებს ველი მე და ობიექტურად რომ ვთქვა, ჩვენი პარტიის „ევროპული საქართველოს“ პროგრამა რეალურად ეკონომიკური კრიზისის დაძლევის პროგრამაა იმიტომ, რომ სხვა დანარჩენი ძირითადად სოციალური პროგრამებია. ზოგი ვარგა, ზოგი არ ვარგა, მაგრამ სოციალური ცეცხლის ჩაქრობით, რასაც ახლა ხელისუფლება აკეთებს, დამწვარი სახლი ხანძრის ჩაქრობით ვერ აღდგება და ეკონომიკა ამ წუთას არის დამწვარი სახლივით და მას სჭირდება ახალი ცემენტი, ახალი აგური, ახალი პროექტი დ ახალი იდეა, შესაბამისად ამას ეს ხელისუფლება ვეღარ გააკეთებს“, – განაცხადა უგულავამ.

ცნობისთვის, 15 მაისს საქართველოს პრეზიდენტმა სალომე ზურაბიშვილმა “ევროპული საქართველოს” ერთ-ერთი ლიდერის გიგი უგულავას და თავდაცვის ყოფილი მინისტრის ირაკლი ოქრუაშვილის შეწყალების აქტი გამოსცა. გიგი უგულავამ და ირაკლი ოქრუაშვილმა საპატიმრო დაწესებულება დატოვეს.