დედოფლისწყაროში პრემიერმინისტრის მამის საცხოვრებელი სახლის ღობის დაზიანებისათვის დაკავებული პირი ხონის ფსიქიატრიულ საავადმყოფოში გადაიყვანეს, შესაბამისად, მის მიმართ სამართლებრივი დავა შეწყდა.
როგორც მისმა ადვოკატმა გადანცახადა, გადაწყვეტილება 19 ივნისს, ფსიქიატრიული ექსპერტიზის დასკვნის შედეგად მიიღეს – 33 წლის გიორგი გოჩიტაშვილი დაწესებულებაში იძულებითი წესით მკურნალობის კურსს ორწელიწად-ნახევარი გაივლის.
გოჩიტაშვილმა ტარიელ ღარიბაშვილის ჭიშკარს სატვირთო მანქანა 23 აპრილს დააჯახა და ადგილიდან მიიმალა.
ცნობისთვის, გიორგი გოჩიტაშვილს პროკურატურა სხვისი ნივთის დაზიანებას ან განადგურებას და საზოგადოებრივი წესრიგის დამცველის ან ხელისუფლების სხვა წარმომადგენლის მიმართ წინააღმდეგობას, მუქარასა და ძალადობას ედავებოდა.
შეგახსენებთ, რომ გოჩიტაშვილი ტარიელ ღარიბაშვილთან მუშად იყო დასაქმებული. გავრცელებული ინფორმაციით, მან ტარიელ ღარიბაშვილს სახლის მშენებლობისათვის საჭირო მასალა სთხოვა, რაზეც უარი მიიღო. ამის შემდეგ კი, მეგობრის კუთვნილი კამაზი პრემიერის მამის სახლის ღობეს დააჯახა. გოჩიტაშვილის ოჯახის წევრები აცხადებდნენ, რომ კაცს ფსიქოლოგიური პრობლემები არ ჰქონია.
კომენტარები