პარტია „კანონი და სამართლის“ ლიდერი, თაკო ჩარკვიანი ეხმიანება განცხადებას, რომლის მიხედვითაც, პრემიერ-მინისტრ ირაკლი ღარიბაშვილის მიუნხენში ჩარტერული რეისით გამგზავრებისთვის 34 000 ევრო მისმა მამამ, ტარიელ ღარიბაშვილმა გადაიხადა.
როგორც თაკო ჩარკვიანი აცხადებს, ახლა მათ კითხვები აქვთ პრემიერის მამის ფულის წარმომავლობაზე.
„სულ მქონდა ეჭვი მის ინფანტილიზმთან დაკავშირებით და ეს არის უბრალოდ დასტური, რომ ის არის ძალიან ინფანტილური ადამიანი უბრალოდ ახლა განაცხადა, რომ ასეთი ვარო, პრაქტიკულად ეს თქვა.
ახლა ისე აიჭრებიან, რომ ერთმანეთზე უარეს ინფანტილურ განცხადებებს გააკეთებენ. რომ ჩავუღრმავდეთ, წარმოგიდნიათ რა თქვა? რომ პირველ პირს, მამამ, ტარიელ ღარიბაშვილმა თურმე 34 ათასი გადაუხადა.
აქ საუბარი არის, სად იკვეთება დანაშაულებრივი ქმედება და უკვე გამოიკვეთა. პირველმა პირმა გადაწყვიტა, რომ აჩვენოს ფულის წარმომავლობა მის მამასთან. ახლა მის მამას მოვთხოვთ, ფულის წარმომავლობა აჩვენოს“, – განაცხადა თაკო ჩარკვიანმა.
ცნობისათვის, ტელეკომპანია „პირველთან“ ინტერვიუში Georgian Airways-ის დამფუძნებელმა თამაზ გაიაშვილმა განაცხადა, რომ პრემიერი ირაკლი ღარიბაშვილი გერმანიაში აირზენამ, სამთავრობო თვითმფრინავით წაიყვანა.
ამის შემდეგ, სახელმწიფო დაცვის სპეციალური სამსახურის ხელმძღვანელმა, ანზორ ჩუბინიძემ განაცხადა, რომ პრემიერ-მინისტრის მიუნხენში გამგზავრებასთან დაკავშირებით ფულადი შენატანი კერძო პირის, ტარიელ ღარიბაშვილის მიერ განხორციელდა.
კომენტარები