პატიმრობიდან გათავისუფლებული დენის კულანინი, შესაძ;ლოა, მიგრაციის დეპარტამენტის განთავსების ცენტრში იყოს გადაყვანილი. ადვოკატი ამბობს, რომ მას არ აწვდიან ინფორმაციას და ვერ მოახერხა მისი პოვნა.
კულანინი რუსეთის მოქალაქეა.
ადვოკატის თქმით, თუ საქართველოს მხრიდან აქტივისტის რუსეთში ექსტრადაცია მოხდება, ამ შემთხვევაში მას შესაძლოა საფრთხე დაემუქროს, რადგან ის ომში უკრაინის მხარდამჭერია.
“შსს-ს ჩემთვის არაფერი არ უთქვამს. დღეს გავიგე მეც რომ შეწყალებულთა შორის არის დენის კულანინი. ვრეკავთ მთელი დღეა, როგორც მიგრაციის დეპარტამენტში ასევე პენიტენცირუში, მაგრამ არავინ გვპასუხობს. სიმართლე გითხრათ, მიგრაციის დეპარტამენტშია, თუ სად არის, მე არ მაქვს ინფორმაცია. რა საფრთხე შეიძლება დაემუქროს რუსეთში – თქვენთვის კარგად ცნობილია, რომ ნებისმიერი პოსტი იქნება თუ განცხადება, რომელიც იქნება რუსეთის მხილება ომში ან უკრაინის მხარდაჭერა, როგორ ისჯება რუსეთში. დენისმა ციხიდან არაერთი წერილი გამოაგზავნა, სადაც აქტიურად უჭერს უკრაინას მხარს და გმობს რუსეთის ქმედებებს. შესაბამისად, თუ მისი ექსტრადაცია მოხდება რუსეთში, მას სერიოზული საფრთხე შეიძლება დაემუქროს”, – ამბობს ადვოკატი.
დენის კულანინი რუსული კანონის საწინააღმდეგო აქციაზე დააკავეს, მას რუსთაველის გამზირზე შსს-ს ავტომობილის დაზიანებას ედავებოდნენ და 2 წლით თავისუფლების აღკვეთა ჰქონდა მისჯილი.
კულანინი გუშინ მიხეილ ყაველაშვილის მიერ შეწყალებულ პირებს შორის მოხვდა.
მარიამობის დღესასწაულთან დაკავშირებით მიხეილ ყაველაშვილმა 226 პირი შეიწყალა -მათ შორის არიან დანიელ მუმლაძე, გურამ ხუტაშვილი, ფრიდონ ბუბუტეიშვილი, დენის კულანინ, საბა ჯიქია, დავით ხომერიკი, თორნიკე მჭედლიშვილი, სიმონ მახარაძე და ავთანდილ თოფჩიშვილი.
კომენტარები