“გარკვეული გვერდითი მოვლენები გამოიკვეთა…” – რა გვერდითი მოვლენები გამოიკვეთა აცრის შემდეგ?

დევნილთა, შრომის, ჯანმრთელობისა და სოციალური დაცვის მინისტრის პირველი მოადგილე აცხადებს, რომ AstraZeneca-ს ვაქცინა უსაფრთხოა. თამარ გაბუნია განმარტავს, რომ საქართველო მსოფლიო ჯანდაცვის ორგანიზაციის მიერ გაცემულ რეკომენდაციას ეყრდნობა, რომ ქვეყნებმა, არ უნდა შეაჩერონ AstraZeneca-ს გამოყენება.

თამარ გაბუნიას გაცხადებით სპეციალურ ბაზაში 4500 მედიკოსია დარეგისტრირებული, ამ მომენტისთვის კი- 1143 ექიმი აიცრა. 

“ვაქცინაციის პროცესი გრძელდება, სამინისტროს თანამშრომლებმაც ჩაიტარეს აცრა. ჩვენ თვალს ვადევნებთ, რომ პროცესი არ შეფერხდეს და გაგრძელდეს უსაფრთხოდ. გარკვეული გვერდითი მოვლენები გამოიკვეთა, მცირე ტემპერატურის მომატება, ზოგიერთ შემთხვევაში შეუძლოდ ყოფნა, თუმცა სერიოზული გვედითი მოვლენა არ დაფიქსირებულა. ეს არის სტანდარტული ფარმაკოზედამხედველური პრაქტიკა, როდესაც მედიკამენტთან მიმართებაში ფიქსირდება რაიმე სერიოზული გვერდითი მოვლენა. ამ შემთხვევაში, მარეგულირებელი ვალდებულია შეაჩეროს მედიკამენტის მოხმარება, ვიდრე არ დადგინდება შედეგობრივი კავშირი ამ ორ მოვლენას შორის,”- აცხადებს დევნილთა, შრომის, ჯანმრთელობისა და სოციალური დაცვის მინისტრის პირველი მოადგილე თამარ გაბუნია.

შეგახსენებთ, ჯანდაცვის ექსპერტ გიორგი ფხაკაძის აზრით, “ასტრაზენეკას” ვაქცინა სასწრაფოდ შესაჩერებელია. ის აცხადებს იმასაც, რომ საქართველოს ვაქცინის გეგმაში პირდაპირაა მითითებული რომ ჯანმოს გარდა, ქვეყანამ უნდა გაიზიაროს სხვა მარეგულირებელი ორგანიზაციების რეკომენდაციებიც:

“ახლა რა წერია ჩვენი, საქართველოს ვაქცინაციის პროგრამაში – ჩვენ შემოვიტანთ ვაქცინებს, რომელიც არის დამტკიცებული ჯანდაცვის მსოფლიო ორგანიზაციის და ძლიერი მარეგულირებლის მიერო, ახლა გამეცით პასუხი, ვინ არის ძლიერი მარეგულირებელი?

შეჩერდა ევროპაში, საფრანგეთში და გერმანიაში ასტრაზენეკას ვაქცინა, გამეცით პასუხი – ვინ შეაჩერებს ასტრაზენეკას ვაქცინას საქართველოში?”