“გამოცხადებული სამოქალაქო ომის მოლოდინია ამ ქვეყანაში!“ – ირაკლი ტაბლიაშვილი

ანალიტიკოსი ირაკლი ტაბლიაშვილი მიიჩნევს, რომ ქვეყანა გამოცხადებული სამოქალაქო ომის მოლოდინშია.
ასე ანალიტიკოსი მიხეილ სააკაშვილის მიერ საქართველოში ჩამოსვლის დაანონსებასა და პრემიერ ღარიბაშვილის განცხადებას ეხმაურება იმის შესახებ, რომ სააკაშვილს, მასზე გაბრაზებული ადამიანები დახვდებიან.

„სააკაშვილს დახვდება 100 ათასი მასზე გაბრაზებული ადამიანი! – თქვა ღარიბაშვილმა!..
ახლა მე ვიტყვი:
ხელისუფლების ძალისხმევის გარეშე, წარმოუდგენელი! შეუძლებელია! ვინმე სადმე შეიკრიბოს! სხვაგვარად ვიტყვი – თუ კოლექტიურ “გლდანელ ვოლკებს” არ ეუბნები, წადით და დახვდით სააკაშვილსო, ისინი ფეხსაც არ გამოადგამენ უბან-ბირჟებიდან!“- წერს ირაკლი ტაბლიაშვილი სოციალურ ქსელში.
მისი აზრით, პრემიერის განცხადება სამოქალაქო ომისაკენ მოწოდებაა და „ამავე ჟანრიდანაა“ კახა კალაძის განცხადებაც „ბოროტ ჟურნალისტებზე“
„100 ათასი მოქალაქის მისვლის დაანონსება სხვა არაფერია თუ არა მოწოდება სამოქალაქო ომისკენ კი არა, ბოდიში ჟარგონისთვის, სააკაშვილის მომხრეების ჩაჩმორებისთვის!

მათაც, სააკაშვილის მომხრეებსაც აქვთ ძალა, და ვინ მოიგებს ჩხუბს, მე ვიცი, მაგრამ, თავად ჩხუბის ფაქტია საშინელი.
ამავე ჟანრიდანაა კალაძის საშინელი განცხადება ბოროტ ჟურნალისტებზე! ეს მოქოქილი “ვოლკები” ამგვარი განცხადებების გამო იმარტოხელებენ 20-25 წლის გოგო-ბიჭებს და სცემენ კიდეც, კიდევ ერთხელ.
გამოცხადებული სამოქალაქო ომის მოლოდინია ამ ქვეყანაში!“- წერს ანალიტიკოსი.

ცნობისათვის,პრემიერმა ირაკლი ღარიბაშვილმა ჟრნალისტებთან საუბრისას განაცხადა:  “მე ვთქვი, რომ „ქართულ ოცნებას“ მხარდამჭერების მობილიზება შეგვიძლია ერთ საათში და მინიმუმ 100 000-კაციანი მშვიდობიანი დემონსტრაცია ნებისმიერ დროს განვახორციელოთ. სააკაშვილს არ სჭირდება 100 000 კაცი, მას სჭირდება მინიმუმ 10 პოლიციელი, გამოცდილი კაცი, რომელიც მას დააკავებს.”