გამოძიებამ პროცესზე ვერ დაამტკიცა, რომ რეზო “ჯვარსკი” ე.წ. კანონიერი ქურდია – ყველაზე ახალგაზრდა “ავტორიტეტის” ისტორია

თბილისის საქალაქო სასამართლომ ნაწილობრივ უდანაშაულოდ ცნო ქართველი „კანონიერ ქურდი“, რევაზ უბილავა, რომელიც გასული წლის 13 მაისს კრიმინალურმა პოლიციამ წალენჯიხაში დააკავა.

მას ბრალად ქურდული სამყაროს წევრობა და სახელმწიფო საზღვრის უკანონო კვეთა ედებოდა. მოსამართლემ ბრალდებული ქურდული სამყაროს წევრობის ნაწილში გაამართლა და თქვა, რომ გამოძიებას შესაბამისი მტკიცებულებები არ გააჩნდა, საზღვრის უკანონო კვეთის ნაწილში კი რევაზ უბილავას 3 წლით თავისუფლების აღკვეთა მიესაჯა, საიდანაც 9 თვე უკვე მოხდილად ჩაეთვალა.

გაირკვა, რომ უბილავამ საქართველოს სახელმწიფო საზღვარი რამდენიმე წლის წინ უკანონოდ, სავარაუდოდ ყალბი დოკუმენტაციით გადაკვეთა და უკრაინაში არალეგალურად აღმოჩნდა. გასული წლის მაისში კი საქართველოში ოკუპირებული აფხაზეთის გავლით დაბრუნდა, რა დროსაც იგი წალენჯიხაში, სპეცოპერაციის შედეგად აიყვანეს.

რევაზ უბილავას კრიმინალურ წრეებში „რეზო ჯვარსკის“ მეტსახელით იცნობენ. “პრაიმტაიმის” ინფორმაციით „კანონიერ ქურდად“ თურქეთში 2014 წელს „აკურთხეს“ და 21 წლის ასაკში ის „ქურდული სამყაროს“ ყველაზე ახალგაზრდა წარმომადგენელი გახდა. იგივე სააგენტოს ინფორმაციით, უბილავას 2018 წელს ქურდული სტატუსი ჩამოართვეს, რასაც წინ უძღოდა კლანებს შორის არსებული დაპირისპირება. უბილავა მერაბ ჯანგველაძის (მერაბ სოხუმსკი) კლანს წარმოადგენს. ეს კლანი დაპირისპირებულია ე.წ. მეგრულ დაჯგუფებასთან, სადაც მოიაზრებიან – მერაბ მზარეულია, კიკო მზარეულია, გოჩა ალფასონი, თამაზ ბარკალაია, ნიკა დგებუაძე და სხვ. მაგალითად, ჯერ კიდევ 2014 წელს რევაზ უბილავაზე, როგორც ჯანგველაძის კლანის წევრზე, მოსკოვის ცენტრში თავდასხმა მოხდა. მაშინ რეზო „ჯვარსკი“, სულ რაღაც, 21 წლის იყო და სიკვდილს სასწაულებრივად გადაურჩა.

გავრცელდა ცნობა, რომ ამ თავდასხმის უკან სწორედ ზემოხსენებული მეგრული კლანი იდგა, კერძოდ, გაიჟღერა კიკო მზარეულიას სახელმა.

ზუსტად ოთხი წლის შემდეგ კი იგივე ჯგუფი რეზო უბილავას კიდევ ერთხელ გაუსწორდა და ჯანგველაძის მიერ მინიჭებული ქურდული სტატუსიც ჩამოართვა.

“პრაიმტაიმის” ინფორმაციით ამჟამად „რეზო ჯვარსკიმ“ ყველაზე ახალგაზრდა ქურდის ტიტული დაიბრუნა – ის წალენჯიხაში სწორედ „კანონიერი ქურდობის“ ბრალდებით დააპატიმრეს.

“ალია” კი აქვე შეგახსენებთ ისევ, რომ მოსამართლემ მიიჩნია, რომ გამოძიებას შესაბამისი მტკიცებულებები არ გააჩნდა რევაზ უბილავას ქურდული სამყაროს წევრობის დასამტკიცებლად.

რეზო უბილავა რამდენჯერმე იყო დაკავებული, მათ შორის კიევში, ანტალიასა და ანკარაში.

2016 წელს უკრაინაში დაკავებულ უბილავას მისცეს შესაძლებლობა თავად აერჩია ქვეყანა, სადაც მისი დეპორტაცია მოხდებოდა.

უბილავამ საქართველოში დეპორტაციაზე უარი განაცხადა, რის შემდეგაც მისივე თანხმობით, ის ბეირუთში გაადეპორტეს.