მას შემდეგ, რაც გავრცელდა გორის საკრებულოს თავმჯდომარის ინტერვიუს ნაწილი, სადაც იგი ოკუპანტ რუსეთს მშვიდობისმყოფელებად მოიხსენიებს, ნაციონალურმა მოძრაობამ მოითხოვა მისი იმპიჩმენტის პროცესის დაწყება. ისინი ამბობდნენ, რომ იმპიჩმენტის პროცედურისთვის ხმების საჭირო რაოდენობას ვერ აგროვებდნენ, რადგან, მათ არ ეთანხმებოდნენ გახარია საქართველოსთვის ფრაქციის წევრები და პასუხოდნენ, რომ ჯერ ინტერვიუს ავთენტურობაა დასადგენი. მოგვიანებით, განცხადება გაავრცელა პარტიამ საქართველოსთვის, სადაც წერია, რომ პარტია არაა წინააღმდეგი თავმჯდომარის იმპიჩმენტის ინიცირების.
გორის საკრებულოში, ფრაქციის თავმჯდომარემ, მამუკა ფანიაშვილმა, სოციალურ ქსელში, დაწერა:
ჩვენი ფრაქციისთვის “გორი საქართველოსთვის” მიუღებელია, ბოლო პერიოდში პრესაში გავრცელებული გორის მუნიციპალიტეტის საკრებულოს თავმჯდომარის განცხადება და ყოველი განცხადება, რომელიც მიზნად ისახავს ოკუპანტი ქვეყნის მიმართ მადლიერების გამოხატვას და მის მიმართ დადებით კონტექსტს. როგორც ვნახეთ საკრებულოს თავმჯდომარე უარყოფს ინტერვიუს ამ ნაწილს და ამტკიცებს რომ შინაარსი შეცვლილია. თუ დადგინდება ტექსტის და მისი შინაარსის ნამდვილობა, მხარს დავუჭერთ ყველა პროცედურულ საკითხს, რომელიც მიზნად ისახავს საკრებულოს თავმჯდომარის უფლებამოსილების შეწყვეტას.
ნაციონალური მოძრაობის თავმჯდომარე, თინა ბოკუჩავა აცხადებს, რომ გორის გახარია საქართველოსთვის ფრაქციის წევრების ტელეფონის ნომრები გამორთულია, თუმცა, უნდა ვთქვათ, რომ საკრებულოს გვერდზე გამოქვეყნებულ მობილურ ნომერზე, “ალია” მამუკა ფანიაშვილს უპრობლემოდ დაუკავშირდა.
სხვათა შორის, მამუკა ფანიაშვილი პარტიის შემწირველიცაა და გასულ წელს, 10 000 ლარის არაფულადი შემოწირულობა ჰქონდა მისგან პარტიას და 2025 წლის ამ პერიოდისთვის კი – 1535 ლარის.
მამუკა ფანიაშვილი:
– პირველ რიგში უნდა ვთქვა, რომ ჩვენ ყველა ანტიევროპულ და პრორუსულ განცხადებას ვემიჯნებით უპირობოდ. საქმე იმაშია, რომ დავით რაზმაძეს, ზოგადად არ ახასიათებს ნათქვამის უკან წაღება, როგორი მიუღებელიც უნდა იყოს. აქამდეც გაუვრცელებია პრორუსული განცხადებები და არ უარჰყვია. თუმცა, სწორედ გამომდინარე იქედან, რომ ადრეც არაერთხელაა შემჩნეული პრორუსულ განცხადებებში, ჩვენ მხარს დავუჭერთ მისი იმპიჩმენტის პროცესს.
– მოდით, ბატონო მამუკა, პირდაპირ მითხარით, მხარს დაუჭერთ ზეგ, თუ მხარს უჭერთ დღეს?
–მხარს ვუჭერთ დღეს, დიახ. ვესაუბრეთ ნაციონალური მოძრაობის წევრებსაც და მომავალ კვირაში, ერთობლივად დავაინიცირებთ.
–დავით რაზმაძე ცნობილია თავისი პრორუსული განცხადებებით და თუ ამ ორ პარტიას, ნაციონალურ მოძრაობასა და გახარია საქართველოსთვის, მისი იმპიჩმენტის შანსი გქონდათ, აქამდე რატომ არ იყენებდით?
–იმპიჩმენტის არა, იმპიჩმენტის დაინიცირების, პროცესის დაწყების. იმპიჩმენტს სჭირდება 20 ხმა მაინც, ჩვენ კი, მხოლოდ 12 ხმა გვაქვს. 12 ხმა საკმარისია ინიცირებისთვის, შემდგომ, იმპიჩმენტს კი, 20 ხმა სჭირდება. შესაბამისად, ეს უფრო პოლიტიკური პროცესი იქნება, სავარაუდოდ. გავიმეორებ, შესაძლოა, მან ისევ უარჰყოს, რომ არ უთქვამს მსგავსი „ნიუ იორკ თაიმსის” ჟურნალისტთან, თუმცა, მას არაერთხელ გაუკეთებია პრორუსული განცხადებები.
–მას შემდეგ, რაც თქვენმა პარტიან განცხადება გააკეთა, რომ არაა წინააღმდეგი იმპიჩმენტის პროცედურის დაწყების, თინა ბოკუჩავამ დაწერა სოციალურ ქსელში, რომ გორში, პარტიის ფრაქციის წევრებს ტელეფონები გამორთული გაქვთ და რომ იტყუებით…
–არ ვიცი რა გითხრათ, თქვენ ხომ უპრობლემოდ დამირეკეთ? გამოდის, თინა ბოკუჩავა შეცდა.
კომენტარები