„გამიხარდებოდა, აქციაზე გაცილებით ბევრი ვყოფილიყავით, ეს არ არის ადეკვატური სურათი, თუმცა ასახავს იმ რეალობას, რა რეალობაშიც ჩვენ თავი ჩავიგდეთ“ – ნიკა მელია აქციაზე

სააკაშვილის საზღვარგარეთ გადაყვანის მოთხოვნით, თბილისსა და ბათუმში აქცია მიმდინარეობას. ნაცმოძრაობის ყოფილი თავმჯდომარე, ნიკა მელია აცხადებს:

„დეკლარირებული მიზანი, რომელიც გულისხმობს მიხეილ სააკაშვილის გათავისუფლებას და ევროპულ მომავალს, არის ის მიზანი, რომლის გარშემოც ყველანი ვართ გაერთიანებული. მაშინ, როცა საერთაშორისო პოლიტიკური საზოგადოება არის კონსოლიდირებული, ამ დროს ჩვენ კიდევ უფრო მეტად გვმართებს ძალების მოკრება ქვეყნის შიგნით. სამწუხაროდ, ჩვენ დაგვიდგა რეალობა, როცა ჩატეხილი ხიდების აღდგენა გვჭირდება, მათ შორის პარტიის შიგნით. იდეური ერთობა სხვადასხვა პროცესების გამო, სხვადასხვა მიმართულებით იქნა მორღვეული და მან დაღი დაასვა აქტიურ სოლიდარობას მიშას საკითხთან დაკავშირებით ქვეყნის შიგნით.

ჩვენ არასოდეს არ უნდა ვაკადროთ საკუთარ ამომრჩეველს და განსაკუთრებით პატიმარს ტყუილი და მიმაჩნია, რომ რაციონალური, პრაგმატული, შედეგზე ორიენტირებული ნაბიჯები უნდა გადაიდგას, რომლებსაც მიხეილ სააკაშვილის პატიმრობის ვადის შემცირება მოჰყვება და არა გაზრდა. გამიხარდებოდა, აქციაზე გაცილებით ბევრი ვყოფილიყავით, ეს არ არის ადეკვატური სურათი, თუმცა ასახავს იმ რეალობას, რა რეალობაშიც ჩვენ თავი ჩავიგდეთ“