ფრაქცია „ქართული ოცნების“ თავმჯდომარე ირაკლი კობახიძე განაცხადებს, რომ გიორგი გახარიას ნიკა მელიას მიმართ სასამართლო გადაწყვეტილების აღსრულების ვადებთან დაკავშირებით, „ქართული ოცნების“ სხვა წევრებისგან განსხვავებული მოსაზრება ჰქონდა.
კობახიძის თქმით, გიორგი გახარიას ზემოხსენებულ საკითხთან დაკავშირებით განსხვავებული პოზიცია ჰქონდა, თუმცა მისი პოზიციის გასამყარებლად გახარიას საკმარისი არგუმენტები არ წარმოუდგენია.
„წყალგამყოფი იყო საკითხი, სახელმწიფომ უნდა აჩვენოს თავისი სახე როგორც სახელმწიფომ, თუ არა.“ – აცხადებს კობახიძე.
„ქართული ოცნების“ თავმჯდომარის განცხადებით, კანონის სათანადოდ არ აღსრულება ხელს შეუწყობს პოლიტიკურ რადიკალიზაციასა და პოლარიზაციას ქვეყანაში.
„ქვეყანა, სადაც არ არის უზრუნველყოფილი კანონის აღსრულება, იმ პირობებში, როცა დამნაშავეები ასეთი უხეში გამოწვევის წინაშე აყენებენ, ვერ შედგება როგორ სახელმწიფო.“ – განაცხადა მან.
კობახიძის თქმით, სახელმწიფოს პასუხისმგებლობაა მყარად დაიცვას სახელმწიფოს ღირსება.
„გიორგი გახარიას გადაწყვეტილების ფონზე, შს მინისტრმა მიიღო ლოგიკური გადაწყვეტილება მელიას დაპატიმრების პროცესის გადადების თაობაზე. ახლა პოლიტიკური გუნდის ყურადღება მთლიანად იქნება კონცენტრირებული ახალი მთავრობის ფორმირებისკენ.“ – აცხადებს ირაკლი კობახიძე.
მისი თქმით, მთავრობის ფორმირება დაიწყება და დასრულდება კანონით გათვალისწინებულ უმოკლეს ვადებში .
და ბოლოს, ირაკლი კობახიძე მოუწოდებს ნიკა მელიას, დაემორჩილოს კანონს.
„მოვუწოდებ მელიას, დაემორჩილოს კანონს, წინააღმდეგ შემთხვევაში ხელისუფლება უზრუნველყოფს კანონის აღსრულებას და მის დაპატიმრებას.“ – განაცხადა მან.
ინფორმაციისთვის, დღეს, 17 თებერვალს, გიორგი გახარია პრემიერის პოსტიდან გადადგა.
კომენტარები