„ევროპული საქართველოს“ წევრებმა „ალმას“ ივანიშვილის „ცხოველების ფერმის“ ბილბორდის გაკვრის მოთხოვნის თაობაზე წერილით მიმართეს

„სამუშაო დღის ბოლომდე ველოდებით კომპანია „ალმას“ გვითხრას კონკრეტული მისამართი, სადაც ჩვენ მიერ წარდგენილ ბილბორდის ნიმუშებს განათავსებს“ – ამის შესახებ „ევროპული საქართველოსა“ და ოპოზიციის შეთანხმებულმა კანდიდატებმა ჩუღურეთსა და ისანში, გიორგი ნონიაშვილმა და ბესიკ დონაძემ სარეკლამო კომპანია „ალმასთან“ ჟურნალისტებთან საუბრისას განაცხადეს.

„ჩვენ მოვედით კომპანია ალმასთან, რომელსაც ფაქტობრივად თბილისის ყველა ბანერი ეკუთვნის, მათ შორის სისხლიანი, სამარცხვინო ბანერები, რომელიც მთლიანად სიძულვილითაა გაღვივებული. ჩვენ მივმართეთ ამავდროულად სასწრაფოდ ჩვენი ბანერის განთავსების მოთხოვნით, რადგან არჩევნებამდე მხოლოდ 3 დღე არის დარჩენილი. ეს ბანერი ჯორჯ ორუელის ცნობილ ნაწარმოებზე, „ცხოველების ფერმის“ მოტივებზეა აგებული, რომელიც ბიძინა ივანიშვილს ძალიან მოსწონს. ჩვენ გვგონია, რომ ეს ნაწარმოები დღევანდელი საქართველოსთვის მნიშვნელოვანი და რელევანტურია, იმიტომ რომ ზუსტად ისე ექცევა ივანიშვილი მის მთავრობასთან ერთად ხალხს, როგორც ამ მძიმე ნაწარმოებშია აღწერილი. შესაბამისად ეს ბანერი ბიძინა ივანიშვილს ვიზუალურადაც ჰგავს, ამიტომ გვინდა ამ ბანერის განთავსება. გვაინტერესებს, ის ბოროტების შემცველი, სიძულვილის გამაღვივებელი, სისხლიანი ბანერები რომ განათავსეს, რომელზე ამბობენ რომ კერძო კერძო პირებმა შეგვიკვეთესო თუ განათავსებენ ჩვენს ბანერსაც, ეს არის ჩვენთვის მნიშვნელოვანი. ვითხოვთ და წერილით მივმართავთ ოფიციალურად, რომ თბილისში, სადაც შესაძლებელია, ნებისმიერ ბილბორდზე ეს ბანერი განგვითავსონ.“- განაცხადა ნონიაშვილმა“ – გიორგი ნონიაშვილი

„ჩვენ მოვედი ალმაში, შიგნით არიან თანამშრომლები, თუმცა კარს არავინ არ გვიღებს. შეიძლება მოიფიქრონ, რომ ონლაინ რეჟიმზე არიან გადასულები, ბევრი მიზეზის მოფიქრება შეიძლება იმის გასამართლებლად, რომ წერილი არ ჩაიბარონ, მაგრამ ჩვენ ამ წერილს მაინც ჩავაბარებთ ნებისმიერი სახით, ელექტრონული იქნება თუ ფიზიკურად გადაცემა ბატონი ფხაკაძესთვის. ჩვენი მოთხოვნა არის შემდეგი, რომ დღეს, დღის ბოლომდე, კომპანია „ალმამ“ „ევროპულ საქართველოს“ აცნობოს იმ ადგილმდებარეობისა და სარეკლამო ადგილის შესახებ, მისამართზე, სადაც განათავსებს ჩვენს მიერ წარდგენილ ბილბორდს. ეს არის საარჩევნო ბილბორდი, პოლიტიკური შინაარსის, ეს არის საარჩევნო მოწოდების რეკლამა, გამომდინარე აქედან სამუშაო დღის ბოლომდე ველოდებით კომპანია „ალმას“ გვითხრას კონკრეტული მისამართი, სადაც ჩვენ მიერ წარდგენილ ბილბორდის ნიმუშებს განათავსებს.“ – განაცხადა დონაძემ

ცნობისთვის, სარეკლამო კომპანია „ალმამ“ თბილისის მასშტაბით მმართველი გუნდის მხარდამჭერი ე.წ „სისხლიანი ბანერები განათავსა, თუმცა დამკვეთად კერძო პირი დაასახელა.

ნიუპოსტი