მაშინ როცა ევროპა მაღალი ტემპერატურით რეკორდებს ხსნის, საქართველოში ამინდი უფრო და უფრო უარესდება. 3 ივლისს სტეფანწმინდაში მოთოვა, თუშეთი-ალვანის დამაკავშირებელი გზა წყალმა ჩამორეცხა, ბათუმში და სხვაგან უხვი ნალექი, ტემპერატურის მკვეთრი ვარდნა ფიქსირდება…
გარემოს ეროვნული სააგენტოს ცნობით, 5 ივლისს დღისით, აღმოსავლეთ საქართველოში და დასავლეთ საქართველოს მთიან რაიონებში ზოგან მოსალოდნელია დროგამოშვებით ძლიერი ხანმოკლე წვიმა, ელჭექი, ქარის გაძლიერება, აღმოსავლეთ საქართველოში შესაძლებელია სეტყვა.
ამინდის გრძელვადიანი პროგნოზების განყოფილების უფროსი, ხათუნა ქოქოსაძე გვესაუბრება ითვლება თუ არა ანომალიურ მოვლენად საქართველოში ივლისის დასაწყისში თოვლი და როდიდან გამოიდარებს…
– საქართველოში სიცივე ჩრდილოეთიდან წამოსულ ცივი და ნოტიო ჰაერის მასებით არის გამოწვეული, რომელიც დასავლეთიდან, შავი ზღვის მხრიდან შემოდის. გარკვეულწილად რასაკვირველია კლიმატის ცვლილება მოქმედებს, მაგრამ დამაიმედებელი ის არის, რომ მომდევნო კვირიდან დათბება.
დღეს არის ღრუბლიანი, ნალექიანი დღე, ასეთი იქნება ხვალაც, თუმცა ნალექი შესუსტდება და კვირიდან საქართველოს უმეტეს რაიონში გამოიდარებს. ორშაბათიდან ტემპერატურაც მოიმატებს
10-11 ივლისს დასავლეთ საქართველოში ჰაერის მაქსიმალური ტემპერატურა 38 გრადუსამდე მიაღწევს, კვირის ბოლოსკენ ცოტას დაიკლებს, რადგან წვიმაა მოსალოდნელი. აღმოსავლეთ საქართველოშიც გამოიდარებს, ოღონდ აქ კვირის დასაწყისში იქნება 34-35 გრადუსი და კვირის ბოლოსკენ კიდევ უფრო მოიმატებს.
რაც შეეხება უამინდობას, კვირის ჩათვლით არამდგრადი ამინდებია მოსალოდნელი. კვირას შეიძლება ღრუბლიანი ამინდი იყოს, ნალექი აღარ იქნება.
– ბოლო წლებში ივლისის დასაწყისში საქართველოში თოვლი მოსულა?
– ზღვის დონიდან 1700 მ-ზე მაღალ ზონაში ჰაერის ტემპერატურამ მზის ამოსვლის წინ იშვიათად, მხოლოდ ცალკეულ წლებში შეიძლება დაიწიოს 2-5 გრადუს ყინვამდე.
ადრე უფრო მეტად ივნისში მოსულა. როგორც მოგახსენეთ, კლიმატის ცვლილება ახდენს გავლენას. სიგრილემ ზაფხულში გადმოიწია და სიცხეებმა აგვისტოს ბოლოსკენ .
– ევროპის სიცხეები არ ახდენს გავლენას საქართველოზე?
– ზუსტად ის სიცხეები წამოვა საქართველოსკენ მომავალი კვირიდან ოღონდ შესუსტებული ფორმით. ისეთი საგანგაშო ნიშნული არ იქნება. ევროპაში სამხრეთიდან წამოსულმა ჰაერის მასამ მოახდინა გავლენა, ჯერ დასავლეთ, შემდეგ აღმოსავლეთ ევროპაში. ახლა ეს სიცხეები ჩვენკენ მოიწევს.
– ზაფხული როგორი იქნება?
– ცხელი ზაფხული გვექნება, შედარებით ნაკლებად ნალექიანი. თუმცა ცალკეულ პერიოდებში იქნება შედარებით გრილი და ნოტიო ჰაერის მასების შემოჭრა, რასაც მოჰყვება ამინდის გაუარესება, წვიმა, ქარი და ტემპერატურის კლება მაღალი ნიშნულიდან დაბალი ნიშნულისკენ.
ადრე თუ იყო ივნისის შუა რიცხვებიდან აგვისტოს შუა რიცხვებამდე იყო სიცხეები და გამოთქმაც არსებობდა, რომ ფერიცვალების შემდეგ აუცილებლად აგრილდებოდა, ახლა ასე აღარ არის. მაქსიმალური ტემპერატურები აგვისტოში უფრო ფიქსირდება.
ambebi.ge
კომენტარები